തിരുവനന്തപുരം: യുവ ഡോക്ടറുടെ പീഡന പരാതിയിൽ അറസ്റ്റിലായ റാപ്പർ വേടനെതിരെ ഗൂഢാലോചന നടന്നതായി ആരോപണവുമായി കുടുംബം രംഗത്ത്. വേടനെ സ്ഥിരം കുറ്റവാളിയാക്കി ചിത്രീകരിക്കാൻ ശ്രമം നടക്കുന്നുണ്ടെന്നും, ഇതിനു പിന്നിൽ രാഷ്ട്രീയ ഗൂഢാലോചനയുണ്ടെന്ന് സംശയിക്കുന്നതായും സഹോദരൻ മുഖ്യമന്ത്രിക്ക് നൽകിയ പരാതിയിൽ പറയുന്നു.
ബുധനാഴ്ച തൃക്കാക്കര പോലീസ് അറസ്റ്റ് ചെയ്ത വേടനെ, മുൻകൂർ ജാമ്യമുള്ളതിനാൽ വൈദ്യപരിശോധനയ്ക്ക് ശേഷം വിട്ടയച്ചിരുന്നു. വേടനെതിരെ ഡിജിറ്റൽ തെളിവുകളുണ്ടെന്ന് അന്വേഷണ സംഘം അറിയിച്ചു. തൃക്കാക്കര എസിപിയുടെ നേതൃത്വത്തിലായിരുന്നു ചോദ്യം ചെയ്യൽ. ചോദ്യം ചെയ്യലിന് ശേഷം മാധ്യമങ്ങളെ കണ്ട വേടൻ, എല്ലാം പിന്നീട് പറയാമെന്ന് പ്രതികരിച്ചു.
വിവാഹ വാഗ്ദാനം നൽകി അഞ്ച് തവണ പീഡിപ്പിച്ചുവെന്നാണ് യുവ ഡോക്ടറുടെ പരാതി. ഇതിനിടെ, എറണാകുളം സെൻട്രൽ പോലീസ് രജിസ്റ്റർ ചെയ്ത മറ്റൊരു പീഡനക്കേസിൽ വേടന് എറണാകുളം അഡീഷണൽ സെഷൻസ് കോടതി മുൻകൂർ ജാമ്യം അനുവദിച്ചിരുന്നു.
അതേസമയം, ലൈംഗിക ആരോപണങ്ങൾക്കിടെ പത്തനംതിട്ട കോന്നിയിൽ നടന്ന സംഗീത പരിപാടിയിൽ വേടൻ പങ്കെടുത്തത് വിവാദമായിരുന്നു. "ഒരുപാട് ആളുകൾ വിചാരിക്കുന്നത് വേടൻ എവിടെയോ പോയി എന്നാണ്. ഒരു കലാകാരൻ ഒരിക്കലും എവിടെയും പോകുന്നില്ല. ഞാനെന്റെ ഈ ഒറ്റ ജീവിതം ജനങ്ങളുടെ മുന്നിൽ ജീവിച്ചുമരിക്കാൻ തന്നെയാണ് വന്നിരിക്കുന്നത്," എന്ന് വേടൻ പരിപാടിക്കിടെ പറഞ്ഞിരുന്നു. കരിയാട് എന്ന പേരിൽ നടന്ന പരിപാടിയുടെ സമാപന ദിവസമാണ് വേടന്റെ സംഗീത പരിപാടി നടന്നത്.