21 വർഷം മുൻപ് നഷ്ടപ്പെട്ട മൂന്നരപ്പവൻ സ്വർണമാല തിരികെ കിട്ടിയതിന്റെ സന്തോഷത്തിലാണ് തിരുവേഗപ്പുറ പഞ്ചായത്തിലെ പൈലിപ്പുറം സ്വദേശിനി ഖദീജ (65). നഷ്ടപ്പെട്ട മാല അതേ രൂപത്തിലല്ല, മറിച്ച് മറ്റൊരു മാലയുടെ രൂപത്തിലാണ് ഖദീജയെ തേടിയെത്തിയത്.

സംഭവം ഇങ്ങനെ: കഴിഞ്ഞ ദിവസം ഖദീജയുടെ മകൻ ഇബ്രാഹിമിന്റെ നമ്പറിലേക്ക് ഒരു ഫോൺവിളി വന്നു. പലചരക്ക് കടയിൽ ഒരു കൊറിയർ ഏൽപ്പിച്ചിട്ടുണ്ടെന്നും അത് കൈപ്പറ്റണമെന്നുമായിരുന്നു ആവശ്യം. ഓൺലൈനിൽ ഓർഡർ ചെയ്ത സാധനമായിരിക്കുമെന്ന് കരുതി ഇബ്രാഹിം കവർ കൈപ്പറ്റി. വീട്ടിലെത്തി തുറന്നുനോക്കിയപ്പോൾ അതിൽ ഒരു കത്തും സ്വർണ്ണാഭരണവുമാണ് ഉണ്ടായിരുന്നത്.

വർഷങ്ങൾക്ക് മുൻപ് നഷ്ടപ്പെട്ട സ്വർണ്ണാഭരണം തനിക്കാണ് കിട്ടിയതെന്നും അത് താൻ ഉപയോഗപ്പെടുത്തിയെന്നും കത്തിൽ പറയുന്നു. അതിന് ഇപ്പോൾ വല്ലാത്ത ദുഃഖമുണ്ടെന്നും, അതിനാൽ അതിന് സമാനമായ ഒരു ആഭരണം തിരികെ നൽകുന്നുവെന്നും കത്തിൽ എഴുതിയിരുന്നു. തന്നെ സന്തോഷത്തോടെ സ്വീകരിക്കണമെന്നും ദുആയിൽ ഉൾപ്പെടുത്തണമെന്നും കത്തിൽ അഭ്യർത്ഥിക്കുന്നു.

21 വർഷം മുൻപ് ഖദീജയും മകൻ ഇബ്രാഹിമും വളാഞ്ചേരി വലിയകുന്നിലേക്ക് ഡോക്ടറെ കാണാൻ പോവുകയായിരുന്നു. ഈ യാത്രയ്ക്കിടയിലാണ് മാല നഷ്ടമായത്. ഏറെ അന്വേഷിച്ചെങ്കിലും കണ്ടെത്താൻ കഴിഞ്ഞില്ല. വിദേശത്തായിരുന്ന മറ്റൊരു മകൻ പകരം പുതിയൊരു മാല ഖദീജയ്ക്ക് വാങ്ങി നൽകിയിരുന്നു. നഷ്ടപ്പെട്ട സ്വർണ്ണത്തെക്കുറിച്ച് ഓർമകൾ മാത്രമായിരിക്കെയാണ് അപ്രതീക്ഷിതമായി മാല തിരികെ കിട്ടിയത്. സ്വർണം തിരികെ നൽകിയ വ്യക്തി ആരാണെന്ന് അന്വേഷിക്കാൻ താല്പര്യമില്ലെന്ന് ഇബ്രാഹിം പറഞ്ഞു.