മലയാളികൾക്ക് ഓണസമ്മാനമായി തിരുവനന്തപുരം-മംഗലാപുരം വന്ദേ ഭാരത് എക്സ്പ്രസിന് നാല് അധിക കോച്ചുകൾ കൂടി അനുവദിച്ചു. ഇതോടെ ട്രെയിനിലെ കോച്ചുകളുടെ എണ്ണം 16-ൽ നിന്ന് 20 ആയി വർധിക്കും. സെപ്റ്റംബർ 9 മുതൽ ഈ മാറ്റം പ്രാബല്യത്തിൽ വരും.

ആലപ്പുഴ വഴിയുള്ള വന്ദേഭാരത് എക്സ്പ്രസിലാണ് പുതിയ കോച്ചുകൾ കൂട്ടിച്ചേർക്കുന്നത്. ഇത് വന്ദേഭാരതിലെ ടിക്കറ്റ് ലഭ്യത വർധിപ്പിക്കാൻ സഹായിക്കും. യാത്രക്കാർക്കിടയിലെ വർധിച്ചുവരുന്ന ആവശ്യകത കണക്കിലെടുത്താണ് റെയിൽവേയുടെ ഈ തീരുമാനം.

2025-26 സാമ്പത്തിക വർഷത്തിലെ ജൂലൈ 31 വരെയുള്ള യാത്രക്കാരുടെ എണ്ണം പരിഗണിച്ചാണ് കോച്ചുകൾ വർധിപ്പിക്കാൻ റെയിൽവേ തീരുമാനിച്ചത്. നിലവിൽ, ഇന്ത്യൻ റെയിൽവേ 144 വന്ദേ ഭാരത് ട്രെയിനുകൾ സർവീസ് നടത്തുന്നുണ്ട്. എല്ലാ വന്ദേ ഭാരത് ട്രെയിനുകളും യാത്രക്കാരുടെ എണ്ണത്തിൽ മികച്ച മുന്നേറ്റം കാഴ്ചവെച്ചിട്ടുണ്ട്.

2024-25 സാമ്പത്തിക വർഷത്തിൽ 102.01 ശതമാനവും 2025-26 സാമ്പത്തിക വർഷത്തിൽ (ജൂൺ 2025 വരെ) 105.03 ശതമാനവുമാണ് വന്ദേ ഭാരത് ട്രെയിനുകളിലെ യാത്രക്കാരുടെ എണ്ണം.