ഡോ. പി. സരിനെതിരെ ലൈംഗികാരോപണവുമായി ട്രാൻസ്‌ജെൻഡർ യുവതിയായ രാഗ രഞ്ജിനി രംഗത്ത്. യൂത്ത് കോൺഗ്രസ് നേതാവായ രാഹുൽ മാങ്കൂട്ടത്തിനെതിരെയുള്ള ആരോപണങ്ങളിൽ സരിൻ ശക്തമായ വിമർശനം ഉന്നയിച്ചതിന് തൊട്ടുപിന്നാലെയാണ് ഈ പുതിയ ആരോപണം ഉയർന്നത്.
"സൗമ്യ സരിൻ, നിങ്ങളുടെ ഭർത്താവിൽ നിന്ന് എനിക്ക് മോശം അനുഭവം ഉണ്ടായി" എന്ന് ഫേസ്ബുക്കിൽ കുറിച്ചാണ് രാഗ രഞ്ജിനി ആരോപണത്തിന് തുടക്കമിട്ടത്. കാസർകോട് വെച്ച് സരിൻ തന്നോട് മോശമായി പെരുമാറിയെന്നും, ഒപ്പം താമസിക്കാൻ നിർബന്ധിച്ചെന്നുമാണ് രാഗയുടെ ആരോപണം.
എന്നാൽ, പോസ്റ്റ് വൈറലായതിന് പിന്നാലെ രാഗ രഞ്ജിനി അത് നീക്കം ചെയ്യുകയും, പുതിയൊരു വിശദീകരണക്കുറിപ്പ് പോസ്റ്റ് ചെയ്യുകയും ചെയ്തു. "സത്യത്തിന്റെ മുഖം എത്ര വികൃതമാണ്. തലപൊട്ടി പൊളിയുന്നു. തുറന്നു പറയാൻ എനിക്കുണ്ടാകുന്ന ബുദ്ധിമുട്ട്. അപ്പോൾ മറ്റുള്ളവരുടെ കാര്യം ആലോചിക്കുക.ഞാൻ ഇട്ട പോസ്റ്റ് പിൻവലിച്ചത് കുടുംബത്തിൽ നിന്ന് ബുദ്ധിമുട്ടുള്ളതുകൊണ്ടാണ്. പാർട്ടി പ്രവർത്തനത്തിന് പോകാൻ വീട്ടുകാർ സമ്മതിക്കില്ല" എന്ന് അവർ ആ കുറിപ്പിൽ വ്യക്തമാക്കി.
മുമ്പ്, "തോറ്റ എംഎൽഎ എവിടെ?" എന്ന സോഷ്യൽ മീഡിയയിലെ പരിഹാസത്തിന് സരിന്റെ ഭാര്യ സൗമ്യ സരിൻ ശക്തമായ മറുപടി നൽകിയിരുന്നു. "എന്റെ ഭർത്താവ് തോറ്റിട്ടുണ്ട്. എന്നാൽ മാന്യമായി പകൽ വെളിച്ചത്തിലാണ് തോറ്റത്. അദ്ദേഹം കാരണം എനിക്ക് എവിടേയും തല കുനിക്കേണ്ടി വന്നിട്ടില്ല" എന്നായിരുന്നു സൗമ്യയുടെ മറുപടി.