ഇന്ത്യ-ചൈന ബന്ധങ്ങളിലെ വഴിത്തിരിവിനെയും അതിർത്തികൾ സംബന്ധിച്ച കരാറുകളെയും കൈലാഷ് മാനസരോവർ യാത്ര പുനരാരംഭിക്കുന്നതിനെയും നേരിട്ടുള്ള വിമാനസർവീസുകളെയും ഞങ്ങൾ സ്വാഗതം ചെയ്യുന്നുവെന്ന് സിപിഎം ജനറൽ സെക്രട്ടറി എംഎ ബേബി. നമ്മുടെ ഇരു രാജ്യങ്ങളും തമ്മിലുള്ള നയതന്ത്രബന്ധം സ്ഥാപിച്ചതിൻ്റെ 75-ാം വാർഷികത്തിൽ, ലോകത്തിലെ ഏറ്റവും ജനസംഖ്യയുള്ളതും പുരാതനവുമായ ഈ രണ്ടു രാജ്യങ്ങൾക്കിടയിൽ സൗഹൃദബന്ധങ്ങളും സഹകരണവും ശക്തിപ്പെടുത്തുന്നത് വളരെ നല്ലൊരു കാര്യമാണിതെന്നും നമ്മുടെ ഭാവി പരസ്പര വിശ്വാസം, ബഹുമാനം, വിവേകം എന്നിവയിലായിരിക്കണം എന്ന് ഇരു രാജ്യങ്ങളും വീണ്ടും ഉറപ്പിച്ചത് വളരെ പ്രധാനപ്പെട്ട ഒന്നാണെന്നും അദ്ദേഹം പറഞ്ഞു.

ഗ്ലോബൽ സൗത്തിലെ പ്രധാന അംഗങ്ങൾ എന്ന നിലയിൽ, ബഹുരാഷ്ട്രവാദം ഉയർത്തിപ്പിടിക്കാനും സാമ്രാജ്യത്വ സമ്മർദ്ദങ്ങളെ ചെറുക്കാനും ഒരു ബഹുധ്രുവ ലോകക്രമം വളർത്താനും ഇന്ത്യയ്ക്കും ചൈനയ്ക്കും ചരിത്രപരമായ ഉത്തരവാദിത്തമുണ്ട്. നമ്മുടെ ഇരു രാജ്യങ്ങളും തമ്മിലുള്ള ഐക്യം ശക്തിപ്പെടുത്തുന്നത് നമ്മുടെ ജനങ്ങളുടെ ക്ഷേമത്തിന് മാത്രമല്ല, മാനവരാശിയുടെ സമാധാനത്തിനും പുരോഗതിക്കും കൂടി സഹായകമാകുമെന്നും എം എ ബേബി.