16 ജാപ്പനീസ് പ്രവിശ്യകളുടെ ഗവർണർമാരുമായി കൂടിക്കാഴ്ച നടത്തി പ്രധാനമന്ത്രി നരേന്ദ്ര മോദി. ഇന്ത്യ-ജപ്പാൻ പ്രത്യേക തന്ത്രപരവും ആഗോളവുമായ പങ്കാളിത്തത്തിന് കീഴിൽ സംസ്ഥാന-പ്രവിശ്യ സഹകരണം കൂടുതൽ ശക്തിപ്പെടുത്താൻ അദ്ദേഹം ആഹ്വാനം ചെയ്തു. വിദേശകാര്യ മന്ത്രാലയമാണ് ഇക്കാര്യം പ്രസ്താവനയിലൂടെ അറിയിച്ചത്.
എക്‌സിലെ പോസ്റ്റിൽ മന്ത്രാലയം കുറിച്ചു. ഇന്ത്യ-ജപ്പാൻ ബന്ധത്തിൽ വലിയ മുന്നേറ്റം. പ്രധാനമന്ത്രി നരേന്ദ്ര മോദി ടോക്കിയോയിൽ 16 പ്രവിശ്യകളുടെ ഗവർണർമാരുമായി കൂടിക്കാഴ്ച നടത്തി. സംസ്ഥാനങ്ങൾ തമ്മിലുള്ള സഹകരണത്തിന്റെ സാധ്യതകൾ പ്രധാനമന്ത്രി ഊന്നിപ്പറഞ്ഞു. ഇതിനായി, 15-ാമത് ഇന്ത്യ-ജപ്പാൻ വാർഷിക ഉച്ചകോടിയിൽ ആരംഭിച്ച സംസ്ഥാന-പ്രവിശ്യ പങ്കാളിത്ത സംരംഭത്തിന് കീഴിൽ നടപടികൾ കൈക്കൊള്ളാൻ അദ്ദേഹം ആഹ്വാനം ചെയ്തു. പോസ്റ്റിൽ പറയുന്നു.
സാങ്കേതികവിദ്യ, നവീകരണം, നിക്ഷേപം, നൈപുണ്യം, സ്റ്റാർട്ടപ്പുകൾ, ചെറുകിട ഇടത്തരം വ്യവസായങ്ങൾ തുടങ്ങിയ മേഖലകളിൽ ഇന്ത്യൻ സംസ്ഥാനങ്ങളും ജാപ്പനീസ് പ്രവിശ്യകളും തമ്മിലുള്ള വളരുന്ന പങ്കാളിത്തം എങ്ങനെ കൂടുതൽ ആഴത്തിലാക്കാമെന്ന് ചർച്ചയിൽ പ്രധാനമായും ശ്രദ്ധ കേന്ദ്രീകരിച്ചു. ഇന്ത്യ-ജപ്പാൻ ബന്ധങ്ങൾ പുരാതന നാഗരിക ബന്ധങ്ങളിൽ നിന്ന് ഊർജ്ജം ഉൾക്കൊണ്ട് വളരുകയാണെന്ന് മോദി തന്റെ പ്രസംഗത്തിൽ പറഞ്ഞു. ടോക്കിയോയിലും ഡൽഹിയിലും ശ്രദ്ധ കേന്ദ്രീകരിക്കുന്നതിനുമപ്പുറം സംസ്ഥാന-പ്രവിശ്യ സഹകരണത്തിന് ഒരു പുതിയ ഊന്നൽ നൽകേണ്ട സമയമായെന്നും അദ്ദേഹം പറഞ്ഞു. വ്യാപാരം, സാങ്കേതികവിദ്യ, ടൂറിസം, നൈപുണ്യം, സുരക്ഷ, സാംസ്കാരിക കൈമാറ്റങ്ങൾ എന്നിവയിലെ സഹകരണം വർദ്ധിപ്പിക്കാൻ സംസ്ഥാന-പ്രവിശ്യ പങ്കാളിത്ത സംരംഭം സഹായിക്കുമെന്നും അദ്ദേഹം പറഞ്ഞു.
നിർമ്മാണം, മൊബിലിറ്റി, അടുത്ത തലമുറയിലെ അടിസ്ഥാന സൗകര്യങ്ങൾ, നവീകരണം, സ്റ്റാർട്ടപ്പുകൾ, ചെറുകിട വ്യവസായങ്ങൾ എന്നിവയിൽ ശക്തമായ സഹകരണത്തിന് ജാപ്പനീസ് ഗവർണർമാരോടും ഇന്ത്യൻ സംസ്ഥാന സർക്കാരുകളോടും പ്രധാനമന്ത്രി അഭ്യർത്ഥിച്ചു. ഓരോ ജാപ്പനീസ് പ്രവിശ്യക്കും അതിൻ്റേതായ സാമ്പത്തിക, സാങ്കേതിക ശക്തികളും ഇന്ത്യൻ സംസ്ഥാനങ്ങൾക്ക് അതിൻ്റേതായ സവിശേഷ കഴിവുകളും ഉണ്ടെന്ന് ചൂണ്ടിക്കാട്ടിയ പ്രധാനമന്ത്രി, ഇന്ത്യയുടെ വളർച്ചാ കഥയിൽ സംഭാവന നൽകാൻ ഗവർണർമാരെ ക്ഷണിച്ചു.
യുവജന-നൈപുണ്യ കൈമാറ്റത്തിനും ജാപ്പനീസ് സാങ്കേതികവിദ്യയും ഇന്ത്യൻ പ്രതിഭയും ഒന്നിച്ച് ഉപയോഗിക്കുന്നതിനും സംയുക്ത ശ്രമങ്ങൾ നടത്താനും അദ്ദേഹം ആഹ്വാനം ചെയ്തു. ഉഭയകക്ഷി ബിസിനസ്സ്, വിദ്യാഭ്യാസ, സാംസ്കാരിക, ജനങ്ങൾ തമ്മിലുള്ള ബന്ധങ്ങൾ അടുത്ത ഘട്ടത്തിലേക്ക് കൊണ്ടുപോകുന്നതിൽ ഉപ-ദേശീയ സഹകരണം പ്രധാനമാണെന്ന് ഗവർണർമാർ നിരീക്ഷിച്ചതായും വിദേശകാര്യ മന്ത്രാലയം കൂട്ടിച്ചേർത്തു.