ടൂറിസം രംഗത്തെ ഡിജിറ്റൽ മാർക്കറ്റിംഗ് പരിശ്രമങ്ങൾക്ക് കേരളത്തിന് അന്താരാഷ്ട്ര അംഗീകാരം. ഡിജിറ്റൽ മാധ്യമങ്ങളിലൂടെ വിനോദസഞ്ചാരികളെ ആകർഷിക്കാൻ കേരള ടൂറിസം നടത്തിയ ശ്രമങ്ങൾക്കുള്ള പസഫിക് ഏഷ്യ ട്രാവൽ അസോസിയേഷന്റെ (PATA) 2025 ലെ ഗോൾഡ് അവാർഡ് കേരള ടൂറിസം വകുപ്പ് മന്ത്രി പി.എ. മുഹമ്മദ് റിയാസ് ഏറ്റുവാങ്ങി.
ബാങ്കോക്കിൽ നടന്ന ചടങ്ങിൽ, 'മോസ്റ്റ് എൻഗേജിംഗ് സോഷ്യൽ മീഡിയ ക്യാമ്പെയ്ൻ' വിഭാഗത്തിലാണ് കേരളത്തിന് ഈ പുരസ്കാരം ലഭിച്ചത്. ഏഷ്യ-പസഫിക് മേഖലയിലെ മികച്ച ടൂറിസം നേട്ടങ്ങളെ ആദരിക്കുന്ന പുരസ്‌കാരമാണിത്. മുൻപും കേരളത്തിന് ഈ പുരസ്കാരം ലഭിച്ചിട്ടുണ്ട്.
ഇൻസ്റ്റഗ്രാം, ഫേസ്ബുക്ക്, എക്സ് (Twitter), ലിങ്ക്ഡ്ഇൻ തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിലൂടെ കേരള ടൂറിസം നടത്തിയ പ്രചാരണമാണ് അവാർഡിന് അർഹമായത്.ഈ പ്രചാരണത്തിലൂടെ 1.2 ദശലക്ഷത്തിലധികം ആളുകളിലേക്ക് എത്താനും 89,700-ൽ അധികം ലൈക്കുകളും ഷെയറുകളും നേടാനും സാധിച്ചു.
ഉപയോക്താക്കൾ തന്നെ നിർമ്മിച്ച ഉള്ളടക്കങ്ങൾ, ഇൻഫ്ലുവൻസർമാരുടെ സഹകരണം, കേരളീയ തനിമയുള്ള നർമ്മം എന്നിവയാണ് ഈ ക്യാമ്പെയ്നിന്റെ വിജയത്തിന് പ്രധാന കാരണം. കേരളത്തിന്റെ പ്രകൃതി സൗന്ദര്യവും സംസ്കാരവും പുതിയ രീതിയിൽ അവതരിപ്പിച്ച് പരമ്പരാഗത പരസ്യങ്ങളിൽ നിന്ന് വ്യത്യസ്തമായ ഒരു മാതൃക സൃഷ്ടിക്കാൻ ഈ ക്യാമ്പെയ്നിലൂടെ സാധിച്ചു.
അവാർഡ് സ്വീകരിച്ച ശേഷം മന്ത്രി പി.എ. മുഹമ്മദ് റിയാസ് പറഞ്ഞത്, ഈ പുരസ്കാരം കേരള ടൂറിസത്തിന്റെ പരിശ്രമങ്ങൾക്കുള്ള വലിയ അംഗീകാരമാണെന്നാണ്. സുസ്ഥിരവും എല്ലാവരെയും ഉൾക്കൊള്ളുന്നതുമായ ടൂറിസം മേഖലയുടെ വിജയഗാഥയാണിതെന്നും അദ്ദേഹം കൂട്ടിച്ചേർത്തു. ബാങ്കോക്കിലെ ചടങ്ങിൽ കേരള ടൂറിസം അഡീഷണൽ ഡയറക്ടർ ശ്രീധന്യ സുരേഷും പങ്കെടുത്തു.
പാറ്റ ട്രാവൽ മാർട്ടിനോടനുബന്ധിച്ച് തായ്‌ലൻഡിലെ ഇന്ത്യൻ അംബാസഡർ നാഗേഷ് സിംഗ് കേരളത്തിന്റെ പവലിയൻ ഉദ്ഘാടനം ചെയ്തു. നിരവധി ടൂർ ഓപ്പറേറ്റർമാർ, ട്രാവൽ കമ്പനികൾ, അന്താരാഷ്ട്ര യാത്രാ പ്രസിദ്ധീകരണങ്ങൾ എന്നിവരുമായി സംവദിക്കാൻ പവലിയൻ അവസരമൊരുക്കി. കൈരളി ആയുർവേദിക് ഹെൽത്ത് റിസോർട്ട്, ട്രിപ്പ് എൻ സ്റ്റേ ഹോളിഡേയ്സ് തുടങ്ങിയ കേരളത്തിലെ ടൂറിസം പങ്കാളികളും പവലിയന്റെ ഭാഗമായിരുന്നു.