കൊച്ചി: മലയാള സിനിമയിലെ എക്കാലത്തെയും മികച്ച കോമ്പോകളിൽ ഒന്നായ മോഹൻലാൽ-സത്യൻ അന്തിക്കാട് കൂട്ടുകെട്ടിൽ വീണ്ടും ഒന്നിക്കുന്ന ചിത്രമാണ് 'ഹൃദയപൂർവ്വം'. വലിയ പ്രതീക്ഷകളോടെ കാത്തിരിക്കുന്ന ആരാധകർക്കായി ചിത്രത്തിന്റെ ട്രെയിലർ പുറത്തിറങ്ങി. ഒരു മുഴുനീള ഫൺ ഫാമിലി ചിത്രമായിരിക്കും 'ഹൃദയപൂർവ്വം' എന്ന സൂചനയാണ് ട്രെയിലർ നൽകുന്നത്.
മോഹൻലാലും സംഗീത് പ്രതാപും ഒന്നിച്ചുള്ള കോംബോ പ്രേക്ഷകരുടെ കയ്യടി നേടുമെന്ന് ട്രെയിലർ വ്യക്തമാക്കുന്നു. ട്രെയിലറിലെ ഗാനവും ഇതിനകം ശ്രദ്ധ പിടിച്ചുപറ്റിയിട്ടുണ്ട്. ഓണം റിലീസായി ആഗസ്റ്റ് 28-നാണ് ചിത്രം തീയേറ്ററുകളിൽ എത്തുന്നത്. ആദ്യ ദിനം രാവിലെ 9.30 മുതൽ പ്രദർശനം ആരംഭിക്കും. ആദ്യദിനം മികച്ച കളക്ഷൻ നേടാനാകുമെന്നാണ് പ്രതീക്ഷ.
ആശിർവാദ് സിനിമാസും സത്യൻ അന്തിക്കാടും ഒന്നിക്കുന്ന അഞ്ചാമത്തെ ചിത്രമാണിത്. സത്യൻ അന്തിക്കാടിന്റെ മക്കളായ അഖിൽ സത്യനും അനൂപ് സത്യനും ഈ ചിത്രത്തിൽ പ്രവർത്തിക്കുന്നുണ്ട്. അഖിൽ സത്യനാണ് ചിത്രത്തിന്റെ കഥ ഒരുക്കിയിരിക്കുന്നത്.'എമ്പുരാൻ' എന്ന സിനിമയ്ക്ക് ശേഷം ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രം കൂടിയാണ് 'ഹൃദയപൂർവ്വം'.
അനു മൂത്തേടത്ത് ക്യാമറ കൈകാര്യം ചെയ്യുമ്പോൾ, ജസ്റ്റിൻ പ്രഭാകരനാണ് സംഗീത സംവിധാനം നിർവഹിക്കുന്നത്. ഫാർസ് ഫിലിംസാണ് സിനിമ വിദേശ രാജ്യങ്ങളിൽ പ്രദർശനത്തിനെത്തിക്കുന്നത്. 2015-ൽ പുറത്തിറങ്ങിയ 'എന്നും എപ്പോഴും' എന്ന ചിത്രത്തിന് ശേഷമാണ് ഈ കൂട്ടുകെട്ട് വീണ്ടും ഒന്നിക്കുന്നത്.



