സ്ത്രീധനത്തിന്റെ പേരിൽ വീണ്ടും കൊടും ക്രൂരത. യുവതിയെ പെട്രോൾ ഒഴിച്ച് തീ കൊളുത്തി കൊലപ്പെടുത്തി ഭർത്താവും ഭർതൃമാതാവും ഗ്രേറ്റർ നോയിഡയിലാണ് സമൂഹമനഃസാക്ഷിയെ ഞെട്ടിപ്പിക്കുന്ന സംഭവം നടന്നത്. യുവതിയെ ഭർത്താവും വീട്ടുകാരും ചേർന്ന് മർദ്ദിച്ച ശേഷം തീ കൊളുത്തുകയായിരുന്നു. പൊള്ളലേറ്റ് പടികൾ ഇറങ്ങിവരുന്ന യുവതിയുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.
സ്ത്രീധനത്തിന്റെ പേരിൽ തങ്ങളെ രണ്ട് പേരെയും പീഡിപ്പിക്കുകയായിരുന്നെന്നും 36 ലക്ഷം രൂപ ആവശ്യപ്പെട്ടിരുന്നെന്നും യുവതിയുടെ സഹോദരി പറഞ്ഞു. കൊല്ലപ്പെട്ട യുവതിയും സഹോദരിയും ഒരേ വീട്ടിലേക്കാണ് വിവാഹം കഴിച്ചിരിക്കുന്നത്. സംഭവത്തിൽ നിക്കി എന്ന 28കാരിയാണ് കൊല്ലപ്പെട്ടത്. 2016ലാണ് ഇവരുടെ വിവാഹം കഴിഞ്ഞത്. വിവാഹം കഴിഞ്ഞ് ആറ് മാസം കഴിഞ്ഞപ്പോൾ മുതൽ പീഡനം ആരംഭിച്ചതായി സഹോദരി കാഞ്ചൻ പറഞ്ഞു. വ്യാഴാഴ്ച രാത്രിയിൽ നിക്കിയെ ഭർതൃവീട്ടുകാർ ക്രൂരമായി മർദ്ദിച്ചെന്നും പിന്നീട് മകന്റെ മുന്നിലിട്ട് തീകൊളുത്തുകയായിരുന്നു എന്നും കാഞ്ചൻ പറഞ്ഞു.
പ്രചരിക്കുന്ന വീഡിയോ ദൃശ്യങ്ങളിൽ, നിക്കിയെ ഭർത്താവ് വിപിനും മറ്റൊരു സ്ത്രീയും മുടിയിൽ പിടിച്ച് വലിക്കുന്നതായി കാണാം. ഷർട്ടില്ലാത്ത വിപിന്റെ വയറ്റിലും പുറത്തും രക്തക്കറയുണ്ട്. മറ്റൊരു വീഡിയോയിൽ, പൊള്ളലേറ്റ് പടികൾ ഇറങ്ങിവരുന്ന നിക്കിയെയും ഗുരുതരമായ പൊള്ളലേറ്റതിന് ശേഷം തറയിൽ ഇരിക്കുന്നതും കാണാം. ഒരാൾ പൊള്ളലേറ്റതിന് ശേഷം വെള്ളം ഒഴിക്കുന്നതും ദൃശ്യങ്ങളിലുണ്ട്.
വിവാഹത്തിന് സ്ത്രീധനം കുറഞ്ഞുപോയെന്ന് പറഞ്ഞ് തങ്ങളെ നിരന്തരം പീഡിപ്പിച്ചിരുന്നു. വീട്ടിൽ നിന്ന് 36 ലക്ഷം രൂപ കൊണ്ടുവരാൻ ആവശ്യപ്പെട്ടു. വ്യാഴാഴ്ച പുലർച്ചെ 1.30നും 4നും ഇടയിൽ എന്നെയും അവർ മർദ്ദിച്ചു. നിന്റെ സഹോദരിക്ക് സ്ത്രീധനം കിട്ടി, നിനക്ക് എന്താണ് കൊണ്ടുവരാനുള്ളത്? നീ മരിക്കുന്നതാണ് നല്ലത്. ഞങ്ങൾ വീണ്ടും വിവാഹം കഴിക്കും എന്നും പറഞ്ഞ് അവർ തന്നെ പലതവണ മർദ്ദിച്ചു, തനിക്ക് ഒരു ദിവസത്തേക്ക് ബോധമുണ്ടായിരുന്നില്ലെന്നും കണ്ണീരോടെ കാഞ്ചൻ പറഞ്ഞു.
അതേ ദിവസം വൈകുന്നേരം, എന്റെയും കുട്ടികളുടെയും മുന്നിലിട്ട് അവർ അവളെ ക്രൂരമായി മർദ്ദിച്ചു. പിന്നീട് അവളുടെ ദേഹത്ത് എന്തോ ദ്രാവകം ഒഴിച്ച് തീ കൊളുത്തി. അവളെ രക്ഷിക്കാൻ താൻ ശ്രമിച്ചെങ്കിലും കഴിഞ്ഞില്ല. ആരോ അവളെ ആശുപത്രിയിലെത്തിച്ചു. എനിക്കറിയില്ല ആരാണെന്ന്. താൻ അബോധാവസ്ഥയിലായിരുന്നു… എനിക്ക് നീതി വേണം. എന്റെ സഹോദരി അനുഭവിച്ച അതേ വേദന അവർക്കും അനുഭവിക്കണം, അവർ കൂട്ടിച്ചേർത്തു.