സുപ്രീം കോടതി മുൻ ജഡ്ജി സുദർശൻ റെഡ്ഡി(Sudershan Reddy)യെ ഇന്ത്യ(INDIA) മുന്നണിയുടെ ഉപരാഷ്ട്രപതി സ്ഥാനാർത്ഥിയായി പ്രഖ്യാപിച്ചു. ഇതോടെ എൻഡിഎ സ്ഥാനാർത്ഥി സി.പി. രാധാകൃഷ്ണനെതിരെ മത്സരിക്കാൻ ഒരുങ്ങുകയാണ് മുൻ സുപ്രീം കോടതി ജഡ്ജി. ഈ ഉപരാഷ്ട്രപതി തിരഞ്ഞെടുപ്പ് ഒരു പ്രത്യയശാസ്ത്ര പോരാട്ടമാണെന്നും പ്രതിപക്ഷ പാർട്ടികളെല്ലാം ഈ നിലപാടിനോട് യോജിച്ചു.

അതിനാലാണ് ഞങ്ങൾ ബി. സുദർശൻ റെഡ്ഡിയെ സംയുക്ത സ്ഥാനാർത്ഥിയായി തിരഞ്ഞെടുത്തതെന്നും സ്ഥാനാർത്ഥി പ്രഖ്യാപനത്തിനു പിന്നാലെ കോൺഗ്രസ് അധ്യക്ഷൻ മല്ലികാർജുൻ ഖാർഗെ (Mallikarjun Kharge) പറഞ്ഞു.റെഡ്ഡി ഇന്ത്യയിലെ ഏറ്റവും പ്രഗത്ഭരും പുരോഗമനവാദികളുമായ നിയമജ്ഞരിൽ ഒരാളാണെന്നും ആന്ധ്രാപ്രദേശ് ഹൈക്കോടതി ജഡ്ജി, ഗുവാഹത്തി ഹൈക്കോടതി ചീഫ് ജസ്റ്റിസ്, സുപ്രീം കോടതി ജഡ്ജി എന്നിങ്ങനെ നീണ്ടതും മഹത്തരവുമായ നിയമജീവിതം അദ്ദേഹത്തിനുണ്ടെന്നും ഖാർഗെ ചൂണ്ടിക്കാട്ടി.

സാമൂഹിക, സാമ്പത്തിക, രാഷ്ട്രീയ നീതിക്കുവേണ്ടി നിരന്തരം നിലകൊണ്ട ധീരനായ പോരാളിയാണ് സുദർശൻ റെഡ്ഡി. സാധാരണക്കാരനായ അദ്ദേഹത്തിന്റെ പല വിധിന്യായങ്ങളും വായിച്ചാൽ, ദരിദ്രരോടുള്ള അദ്ദേഹത്തിൻ്റെ നിലപാടും ഭരണഘടനയെയും മൗലികാവകാശങ്ങളെയും സംരക്ഷിക്കുന്നതിൽ അദ്ദേഹം പുലർത്തിയ പ്രതിബദ്ധതയും മനസ്സിലാകുമെന്നും ഖാർ​ഗേ കൂട്ടിച്ചേർത്തു.
പ്രതിപക്ഷ നേതാക്കളോട് തങ്ങളുടെ ഉപരാഷ്ട്രപതി സ്ഥാനാർത്ഥിയെ പിന്തുണച്ച് സമവായമുണ്ടാക്കാൻ ഭരണകക്ഷിയായ എൻഡിഎ അഭ്യർത്ഥന നടത്തിയതിന് പിന്നാലെയാണ് ഈ പ്രഖ്യാപനം വന്നതെന്നതും ശ്രദ്ധേയമാണ്.

ആരാണ് റെഡ്ഡി?

1946-ൽ തെലങ്കാനയിൽ ജനിച്ച ബി. സുദർശൻ റെഡ്ഡി, സുപ്രീം കോടതി ജഡ്ജിയായിരുന്നു. അതിനു മുമ്പ് ഗുവാഹത്തി ഹൈക്കോടതിയുടെ ചീഫ് ജസ്റ്റിസായി സേവനമനുഷ്ഠിച്ചിട്ടുണ്ട്. 1971 ഡിസംബർ 27-ന് ആന്ധ്രാപ്രദേശ് ബാർ കൗൺസിലിൽ അഭിഭാഷകനായി എൻറോൾ ചെയ്തുകൊണ്ടാണ് അദ്ദേഹം തൻ്റെ നിയമ ജീവിതം ആരംഭിച്ചത്.

ആന്ധ്രാപ്രദേശ് ഹൈക്കോടതിയിൽ പ്രധാനമായും റിട്ട്, സിവിൽ കേസുകളിലാണ് അദ്ദേഹം പ്രാക്ടീസ് ചെയ്തിരുന്നത്. 1988 നും 1990 നും ഇടയിൽ അദ്ദേഹം സർക്കാർ പ്ലീഡറായും സേവനമനുഷ്ഠിച്ചു. 1990-ൽ കേന്ദ്ര സർക്കാരിൻ്റെ അഡീഷണൽ സ്റ്റാൻഡിംഗ് കൗൺസലായി ചുരുങ്ങിയ കാലം പ്രവർത്തിച്ചതിന് ശേഷം ഉസ്മാനിയ യൂണിവേഴ്സിറ്റിയുടെ നിയമോപദേഷ്ടാവും സ്റ്റാൻഡിംഗ് കൗൺസലുമായി സേവനമനുഷ്ഠിച്ചു. 1995 മെയ് 2-ന് ആന്ധ്രാപ്രദേശ് ഹൈക്കോടതിയിൽ സ്ഥിരം ജഡ്ജിയായി നിയമിതനായി.