അമേരിക്കയിലെ ഭവന വായ്പാനിരക്കുകളിൽ വൻ കുറവ്. കഴിഞ്ഞ മൂന്ന് വർഷത്തിനിടെ ആദ്യമായി 30 വർഷത്തെ ഫിക്സഡ് റേറ്റ് മോർട്ട്ഗേജ് ശരാശരി 6 ശതമാനത്തിന് താഴെയെത്തി. ഫ്രെഡി മാക് പുറത്തുവിട്ട പുതിയ കണക്കുകൾ പ്രകാരം നിരക്ക് 5.98 ശതമാനമായാണ് കുറഞ്ഞത്. 2022 സെപ്റ്റംബറിന് ശേഷം ഇതാദ്യമായാണ് വായ്പാനിരക്ക് ഇത്രയും താഴേക്ക് വരുന്നത്. കഴിഞ്ഞ ആഴ്ചയിലിത് 6.01 ശതമാനമായിരുന്നു.

ഈ നിരക്ക് കുറവ് വീട് വാങ്ങുന്നവർക്ക് പ്രതിമാസ തിരിച്ചടവിൽ വലിയ ലാഭമുണ്ടാക്കുമെന്നാണ് സാമ്പത്തിക വിദഗ്ധരുടെ വിലയിരുത്തൽ. വരാനിരിക്കുന്ന വസന്തകാലത്ത് ഭവന വിപണിയിൽ കൂടുതൽ ഉണർവ് ഉണ്ടാകാൻ ഇത് കാരണമാകും. ഭവന വിപണിയെ സഹായിക്കുന്നതിനായി മോർട്ട്ഗേജ് ബോണ്ടുകൾ വാങ്ങാൻ ട്രംപ് ഭരണകൂടം ഫാനി മേ, ഫ്രെഡി മാക് എന്നീ സ്ഥാപനങ്ങൾക്ക് നൽകിയ നിർദ്ദേശമാണ് ഈ മാറ്റത്തിന് പിന്നിലെ പ്രധാന ഘടകം. വരും ദിവസങ്ങളിലും നിരക്കുകൾ കൂടുതൽ അനുകൂലമാകുമെന്നാണ് പ്രതീക്ഷിക്കപ്പെടുന്നത്.