ക്ലിഫ്റ്റൺ സെന്റ് ഗ്രീഗോറിയോസ് മലങ്കര ഓർത്തഡോക്സ് ദേവാലയത്തിൽ ഫാമിലി ആൻഡ് യൂത്ത് കോൺഫറൻസ് പ്രചാരണത്തിന്റെ ഭാഗമായി കോൺഫറൻസ് ടീം സന്ദർശനം നടത്തി. സുവനീർ എഡിറ്റർ ഡോ. റെബേക്ക പോത്തൻ, സ്പോർട്സ് കോർഡിനേറ്റർ ജോഷ്വ വർഗീസ് എന്നിവരടങ്ങുന്ന ടീമിനെ ഇടവക വികാരി ഫാ. യേശുദാസൻ പപ്പൻ, സെക്രട്ടറി രഞ്ജിത് മാത്യു എന്നിവർ ചേർന്ന് സ്വീകരിച്ചു. ഈ വർഷത്തെ കോൺഫറൻസിന്റെ തീയതി, പ്രമേയം, വേദി എന്നിവയെക്കുറിച്ച് ഡോ. റെബേക്ക പോത്തൻ വിശദീകരിച്ചു.
കണ്ടനാട് ഈസ്റ്റ് ഭദ്രാസന മെത്രാപ്പോലീത്ത ഡോ. തോമസ് മാർ അത്താനാസിയോസ്, ഹൈറോമോങ്ക് വാസിലിയോസ്, ഫാ. ഡോ. എബി ജോർജ്, ലിജിൻ തോമസ് എന്നിവരാണ് ഇത്തവണത്തെ പ്രധാന പ്രഭാഷകർ. രജിസ്ട്രേഷൻ, സ്പോൺസർഷിപ്പ്, റാഫിൾ ടിക്കറ്റുകൾ എന്നിവയെക്കുറിച്ചുള്ള വിവരങ്ങൾ ജോഷ്വ വർഗീസ് പങ്കുവെച്ചു. സുവനീറിലേക്ക് ലേഖനങ്ങൾ അയക്കുന്നതിനെക്കുറിച്ചും സൈറ്റ് & സൗണ്ട് തിയേറ്ററിലെ “ജോഷ്വ” ഷോയെക്കുറിച്ചും ഡോ. റെബേക്ക സംസാരിച്ചു.
ചടങ്ങിൽ വികാരി ഫാ. യേശുദാസൻ പപ്പൻ രജിസ്ട്രേഷൻ കിക്കോഫ് ഔദ്യോഗികമായി ഉദ്ഘാടനം ചെയ്തു. കോൺഫറൻസിന്റെ വിജയത്തിനായി ടീം നടത്തുന്ന ശ്രമങ്ങളെ അദ്ദേഹം അഭിനന്ദിച്ചു. കൂടാതെ, ഇടവകയിലെ എല്ലാ അംഗങ്ങളും കോൺഫറൻസിൽ രജിസ്റ്റർ ചെയ്യണമെന്നും സുവനീറിൽ പരസ്യങ്ങൾ നൽകിയും റാഫിൾ ടിക്കറ്റുകൾ വാങ്ങിയും ഈ ഉദ്യമത്തോട് സഹകരിക്കണമെന്നും അദ്ദേഹം ആഹ്വാനം ചെയ്തു.