ശബരിമല സ്വർണ്ണ മോഷണക്കേസിൽ നടൻ ജയറാം നേരത്തെ നൽകിയ വിശദീകരണങ്ങളിലെ വൈരുദ്ധ്യങ്ങൾ പുറത്തുവരുന്നു. ചെന്നൈയിലെ സ്മാർട്ട് ക്രിയേഷൻസ് ഓഫീസിൽ വെച്ച് ജയറാം പങ്കെടുത്ത പൂജകൾ വ്യത്യസ്ത ദിവസങ്ങളിലായിരുന്നിട്ടും, അതെല്ലാം ഒരേ ദിവസമാണ് നടന്നതെന്നായിരുന്നു താരം മുൻപ് മാധ്യമങ്ങളോട് പറഞ്ഞിരുന്നത്. ചെന്നൈയിൽ വെച്ച് നടന്നത് കട്ടിള പാളിയുടെ പൂജയായിരുന്നുവെന്നും എന്നാൽ ജയറാമിന്റെ വീട്ടിൽ വെച്ച് നടന്നത് ദ്വാരപാലക ശില്പങ്ങളുടെ പൂജയായിരുന്നുവെന്നും റിപ്പോർട്ടുകൾ സൂചിപ്പിക്കുന്നു. ഈ രണ്ട് പൂജകളും വിവിധ മാസങ്ങളിലാണ് നടന്നതെന്നിരിക്കെയാണ് ജയറാമിന്റെ മുൻ മൊഴികളിലെ വൈരുദ്ധ്യം ചർച്ചയാകുന്നത്.

കേസിലെ മുഖ്യപ്രതിയായ ഉണ്ണികൃഷ്ണൻ പോറ്റി ക്ഷണിച്ചത് പ്രകാരമാണ് താൻ പൂജകളിൽ പങ്കെടുത്തതെന്ന് ജയറാം നേരത്തെ വ്യക്തമാക്കിയിരുന്നു. ശബരിമലയിൽ വെച്ചുള്ള പരിചയമാണ് അദ്ദേഹവുമായുള്ളതെന്നും സന്നദ്ധ പ്രവർത്തനങ്ങളുടെ ഭാഗമായി അദ്ദേഹം വിളിക്കാറുണ്ടെന്നും ജയറാം അന്ന് പ്രതികരിച്ചിരുന്നു. സ്വർണ്ണം പൂശിയ കമ്പനിയിൽ വെച്ചാണ് പൂജ നടന്നതെന്നും അത് ഇത്തരമൊരു വിവാദമായി മാറുമെന്ന് കരുതിയില്ലെന്നുമാണ് നടൻ മുൻപ് നൽകിയ വിശദീകരണം. എന്നാൽ മാതൃഭൂമി പുറത്തുവിട്ട പുതിയ റിപ്പോർട്ടുകൾ പ്രകാരം ഈ മൊഴികളിലെ സമയക്രമങ്ങൾ അവിശ്വസനീയമാണെന്ന് വ്യക്തമാകുന്നു.