കൊച്ചിയിൽ നടന്ന കോൺഗ്രസിന്റെ മഹാപഞ്ചായത്ത് പരിപാടിയിൽ തനിക്ക് ആവശ്യമായ പരിഗണന ലഭിച്ചില്ലെന്ന കാര്യത്തിൽ ശശി തരൂർ എംപി കടുത്ത അതൃപ്തി രേഖപ്പെടുത്തി. എഐസിസി വർക്കിംഗ് കമ്മിറ്റി അംഗമെന്ന നിലയിലുള്ള പ്രാധാന്യം നൽകിയില്ലെന്നാണ് തരൂരിന്റെ പരാതി. ഇക്കാര്യം അദ്ദേഹം കെ.സി. വേണുഗോപാലിനെയും ദീപാദാസ് മുൻഷിയെയും നേരിട്ട് അറിയിച്ചു. എഐസിസി ജനറൽ സെക്രട്ടറി കെ.സി. വേണുഗോപാൽ, കെപിസിസി അധ്യക്ഷൻ സണ്ണി ജോസഫ്, രമേശ് ചെന്നിത്തല തുടങ്ങിയ പ്രമുഖ നേതാക്കൾ പങ്കെടുത്ത മഹാപഞ്ചായത്ത് വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായുള്ള കോൺഗ്രസിന്റെ കരുത്തുറ്റ ശക്തിപ്രകടനമായി മാറി.
കേരളത്തിലെ നിയമസഭാ തിരഞ്ഞെടുപ്പിൽ കോൺഗ്രസ് വലിയ വിജയം കൈവരിക്കുമെന്ന് ചടങ്ങിൽ സംസാരിച്ച രാഹുൽ ഗാന്ധി ആത്മവിശ്വാസം പ്രകടിപ്പിച്ചു. കൊച്ചിയിൽ കെപിസിസി സംഘടിപ്പിച്ച തദ്ദേശ തിരഞ്ഞെടുപ്പ് വിജയാഘോഷ പരിപാടിയിൽ കേരളത്തിലെ രൂക്ഷമായ തൊഴിലില്ലായ്മയെക്കുറിച്ച് അദ്ദേഹം പരാമർശിച്ചു. കോൺഗ്രസ് നേതൃത്വം ജനങ്ങളോടൊപ്പം നിന്ന് പ്രവർത്തിക്കുമെന്നും അദ്ദേഹം ഉറപ്പുനൽകി.
അതേസമയം, വർഗീയതയുടെ പേരിൽ നാടിനെ ഭിന്നിപ്പിക്കാൻ ശ്രമിക്കുന്നവരെ കോൺഗ്രസ് ശക്തമായി നേരിടുമെന്ന് പ്രതിപക്ഷ നേതാവ് വി.ഡി. സതീശൻ പറഞ്ഞു. സി.പി.ഐ.എം വർഗീയതയ്ക്ക് കുടപിടിക്കുകയാണെന്നും വർഗീയവാദികളെ പ്രോത്സാഹിപ്പിക്കുന്ന നിലപാടാണ് അവർ സ്വീകരിക്കുന്നതെന്നും അദ്ദേഹം വിമർശിച്ചു.