ശബരിമല സ്വർണ്ണക്കൊള്ളക്കേസിൽ അറസ്റ്റിലായി തിരുവനന്തപുരം സ്പെഷ്യൽ സബ് ജയിലിൽ പാർപ്പിച്ചിരുന്ന തന്ത്രി കണ്ഠരര് രാജീവർക്ക് ദേഹാസ്വാസ്ഥ്യം അനുഭവപ്പെട്ടു. ഇന്ന് രാവിലെ ജയിലിൽ വെച്ച് അസ്വസ്ഥത പ്രകടിപ്പിച്ചതിനെ തുടർന്ന് ജയിൽ അധികൃതർ അദ്ദേഹത്തെ ആംബുലൻസിൽ തിരുവനന്തപുരം ജനറൽ ആശുപത്രിയിലേക്ക് മാറ്റി. നിലവിൽ അദ്ദേഹത്തെ ആശുപത്രിയിൽ പ്രവേശിപ്പിച്ചിരിക്കുകയാണ്. ചികിത്സ ആവശ്യമായ ഗൗരവകരമായ ആരോഗ്യപ്രശ്നങ്ങൾ ഉണ്ടോ എന്ന് ഉറപ്പുവരുത്താൻ വിശദമായ വൈദ്യപരിശോധനകൾ നടത്തിവരികയാണെന്ന് അധികൃതർ അറിയിച്ചു.
മണിക്കൂറുകൾ നീണ്ട ചോദ്യം ചെയ്യലിന് ശേഷം ഇന്നലെയാണ് പ്രത്യേക അന്വേഷണ സംഘം (SIT) തന്ത്രിയുടെ അറസ്റ്റ് രേഖപ്പെടുത്തിയത്. ശബരിമല ശ്രീകോവിലിന്റെ കട്ടിളപ്പാളി കടത്തിയ കേസിലെ പതിമൂന്നാം പ്രതിയാണ് കണ്ഠരര് രാജീവർ. ദേവസ്വം സ്വത്തുക്കൾ സംരക്ഷിക്കാൻ ബാധ്യസ്ഥനായ തന്ത്രി, പ്രതികൾക്ക് കട്ടിളപ്പാളി കൊണ്ടുപോകാൻ ഒത്താശ ചെയ്തുകൊടുത്തുവെന്നും ശബരിമലയിൽ ആചാരലംഘനം നടത്താൻ കൂട്ടുനിന്നുവെന്നുമാണ് എസ്ഐടിയുടെ റിമാൻഡ് റിപ്പോർട്ടിലെ പ്രധാന ആരോപണങ്ങൾ. കടുത്ത നിയമോപദേശങ്ങൾക്കും തെളിവ് പരിശോധനകൾക്കും ശേഷമാണ് രാജീവർക്കെതിരെ അന്വേഷണ സംഘം നടപടിയെടുത്തത്.
താന്ത്രിക വിധിപ്രകാരം ഏറ്റവും ഉയർന്ന സ്ഥാനത്തിരിക്കുന്ന വ്യക്തി തന്നെ ഇത്തരം ഗുരുതരമായ കുറ്റകൃത്യങ്ങളിൽ ഉൾപ്പെട്ടത് വലിയ ചർച്ചകൾക്കാണ് വഴിതെളിച്ചിരിക്കുന്നത്. ആശുപത്രിയിലെ പരിശോധനകൾക്ക് ശേഷം തന്ത്രിയുടെ ആരോഗ്യനില തൃപ്തികരമാണെങ്കിൽ അദ്ദേഹത്തെ തിരികെ ജയിലിലേക്ക് മാറ്റും.