എച്ച്-1ബി (H1B) വിസ ഇന്റർവ്യൂകൾ വൻതോതിൽ റദ്ദാക്കുന്നതിലുള്ള കടുത്ത ആശങ്ക അമേരിക്കയെ അറിയിച്ച് ഇന്ത്യ. വിസ നടപടികളിലെ കാലതാമസവും അപ്രതീക്ഷിതമായ റദ്ദാക്കലുകളും ഇന്ത്യൻ ഐടി പ്രൊഫഷണലുകളെയും വിദ്യാർത്ഥികളെയും പ്രതികൂലമായി ബാധിക്കുന്ന സാഹചര്യത്തിലാണ് ഇന്ത്യ വിഷയത്തിൽ ഇടപെട്ടത്. വിദേശകാര്യ മന്ത്രാലയം വഴിയാണ് ഇന്ത്യ തങ്ങളുടെ വിയോജിപ്പ് അമേരിക്കൻ അധികൃതരെ ഔദ്യോഗികമായി അറിയിച്ചത്.

ക്രിസ്മസ്, പുതുവത്സര അവധിക്കാലത്ത് ഇന്ത്യയിലേക്ക് മടങ്ങാനിരുന്ന നിരവധി പ്രൊഫഷണലുകളുടെ വിസ സ്റ്റാമ്പിംഗ് അഭിമുഖങ്ങളാണ് അവസാന നിമിഷം റദ്ദാക്കപ്പെട്ടത്. ഇത് അവരുടെ തൊഴിലിനെയും യാത്രാ പദ്ധതികളെയും വലിയ രീതിയിൽ ബാധിച്ചിട്ടുണ്ട്. വിസ നടപടികൾ കൂടുതൽ ലളിതമാക്കണമെന്നും അഭിമുഖങ്ങൾക്കായി നീണ്ട കാത്തിരിപ്പ് ഒഴിവാക്കാൻ അടിയന്തര നടപടി സ്വീകരിക്കണമെന്നും ഇന്ത്യ ആവശ്യപ്പെട്ടു. സാങ്കേതിക തകരാറുകൾ മൂലമാണ് തടസ്സങ്ങൾ ഉണ്ടായതെന്നാണ് യുഎസ് എംബസിയുടെ വിശദീകരണമെങ്കിലും, ഇത് പരിഹരിക്കാൻ വേഗത്തിലുള്ള ഇടപെടൽ വേണമെന്ന് ഇന്ത്യ സമ്മർദ്ദം ചെലുത്തുന്നുണ്ട്.