ഹൂസ്റ്റൺ: മലയാളി അസോസിയേഷൻ ഓഫ് ഗ്രേറ്റർ ഹൂസ്റ്റൺ ഇലക്ഷൻ ഡിബേറ്റ് ഡിസംബർ 7ന്. അമേരിക്കയിലെ ഒരു പ്രമുഖ മലയാളി സംഘടനയാണ് മാഗ് . ഫോമാ, ഫൊക്കാന തുടങ്ങിയ 'അംബ്രല്ല അസോസിയേഷനുകളിലും' മാഗ് സജീവ സാന്നിധ്യമാണ് വഹിക്കുന്നത്. ഇലക്ഷൻ നോമിനേഷനുകൾ പിൻവലിക്കാനുള്ള അവസാന തീയതി കഴിഞ്ഞതോടെ, ഇത്തവണത്തെ മാഗ് തിരഞ്ഞെടുപ്പിൽ രണ്ട് ശക്തമായ പാനലുകളാണ് മത്സരിക്കുന്നത്. ചാക്കോ തോമസ് നേതൃത്വം നൽകുന്ന ടീം ഹാർമണി, റോയി മാത്യു നേതൃത്വം നൽകുന്ന ടീം യുണൈറ്റഡ് എന്നിവയാണവ. രണ്ടു പാനലുകാരും വിജയം ലക്ഷ്യമാക്കി പ്രചാരണ തിരക്കിലാണ്. ഇപ്പോഴത്തെ സംഘടനാ ഇലക്ഷൻ നിരീക്ഷകരുടെ അഭിപ്രായത്തിൽ, ഇരു പാനലുകളും ഒപ്പത്തിനൊപ്പമാണ്.

ഈ സാഹചര്യത്തിൽ, ഒരു സ്വതന്ത്രവേദിയായ കേരള ഡിബേറ്റ് ഫോറം യുഎസ്എയുടെ ആഭിമുഖ്യത്തിൽ സ്ഥാനാർഥികളെയും മറ്റു താൽപര്യമുള്ള എല്ലാവരെയും ഉൾപ്പെടുത്തി ഒരു സ്വതന്ത്ര നിഷ്പക്ഷ സൗഹാർദ്ദ സംവാദവും ഓപ്പൺ ഫോറവും സംഘടിപ്പിക്കുകയാണ്. പരിപാടി ഡിസംബർ ഏഴിന് വൈകുന്നേരം 3.30-ന് (CENTRAL TIME), ഹൂസ്റ്റണിലെ മിസോറി സിറ്റിയിലുള്ള അപ്പനാ ബസാർ ഓഡിറ്റോറിയത്തിൽ (2437 FM 1092 Road, Missouri City TX 77459) വെച്ചാണ് നടക്കുന്നത്.

രണ്ടു പാനലുകാരും ഓരോ ബ്ലോക്കായി ഇരിപ്പിടം മുൻകൂട്ടി ഉറപ്പാക്കണം. അതുപോലെ സ്വതന്ത്ര മത്സരാർഥികൾ ഉണ്ടെങ്കിൽ അവരും സ്വതന്ത്ര വേദിയിൽ ഇരിപ്പുറപ്പിക്കേണ്ടതാണ്. സ്ഥാനാർഥികൾക്ക് സ്വയം പരിചയപ്പെടുത്തുവാനും അംഗങ്ങൾക്കും പൊതുജനങ്ങൾക്കും പത്രമാധ്യമ പ്രതിനിധികൾക്കും അഭിപ്രായങ്ങൾ രേഖപ്പെടുത്തുവാനും ചോദ്യങ്ങൾ ചോദിക്കുവാനും ഉള്ള അവസരം കൊടുക്കുവാൻ കേരള ഡിബേറ്റ് ഫോറം യുഎസ്എ ശ്രമിക്കും.ഈ ഡിബേറ്റ് ഓപ്പൺ ഫോറം യോഗ പരിപാടികൾ തൽസമയം ഫെയ്‌സ്‌ബുക്ക്, യൂട്യൂബ് മീഡിയകളിൽ ലൈവായി കാണാമെന്നും സംഘാടകർ അറിയിച്ചു. കൂടുതൽ വിവരങ്ങൾക്ക് വിളിക്കുക: എ.സി. ജോർജ്: 832 703 5700, അജു ജോൺ വാരിക്കാട്: 832 846 0763, തോമസ് ഓലിയാൻകുന്നേൽ: 713 679 9950.