ന്യൂയോർക്ക്: ന്യൂയോർക്ക് മലയാളി അസോസിയേഷൻ (NYMA - 'നൈമ') സജീവ പ്രവർത്തകനായ ജിൻസ് ജോസഫിനെ 2026-2028 വർഷത്തേക്കുള്ള ഫെഡറേഷൻ ഓഫ് കേരള അസോസിയേഷൻസ് ഇൻ നോർത്ത് അമേരിക്ക (FOKANA) നാഷണൽ കമ്മിറ്റിയിലേക്ക് നാമനിർദ്ദേശം ചെയ്തു. നവംബർ ഒന്നിന് പ്രസിഡന്റ് ബിബിൻ മാത്യുവിന്റെ അധ്യക്ഷതയിൽ ചേർന്ന വാർഷിക പൊതുയോഗത്തിലാണ് ഈ സുപ്രധാന തീരുമാനം കൈക്കൊണ്ടത്. മലയാളി സമൂഹത്തിലെ കായിക, സാംസ്കാരിക പ്രവർത്തനങ്ങളിൽ വർഷങ്ങളായി സജീവ സാന്നിധ്യമായി പ്രവർത്തിച്ചുവരുന്ന ജിൻസ് ജോസഫ്, വിവിധ സംഘടനകളിൽ നിർണ്ണായക ചുമതലകൾ കൈകാര്യം ചെയ്ത് ശ്രദ്ധേയ നേട്ടങ്ങൾ കൈവരിച്ചിട്ടുണ്ട്.

മൂന്ന് വർഷം തുടർച്ചയായി Malayali Ecumenical Church Cricket Tournament-നെ നയിച്ച ജിൻസ്, സമൂഹത്തിന്റെ കായിക ഐക്യത്തിനും യുവതലമുറയുടെ വളർച്ചയ്ക്കും ശക്തമായ പിന്തുണ നൽകി.ഫൊക്കാന ന്യൂയോർക്ക് മെട്രോ റീജിയണലിന്റെ നിലവിലെ Event/Sports Coordinator ആയും ന്യൂയോർക്ക് മലയാളി അസോസിയേഷന്റെ എക്സിക്യൂട്ടീവ് ബോർഡ്/കമ്മിറ്റി അംഗമായും ഇദ്ദേഹം സേവനം അനുഷ്ഠിച്ചു വരുന്നു. തുടർച്ചയായി എട്ട് വർഷം കേരള ക്രിക്കറ്റ് ലീഗിന്റെ പ്രസിഡന്റായി സേവനമനുഷ്ഠിച്ച ജിൻസ്, നിലവിൽ സംഘടനയുടെ ഉപദേഷ്ടാവാണ്. കൂടാതെ, ന്യൂയോർക്ക് മലയാളി സ്പോർട്സ് ക്ലബ്ബിൽ ക്രിക്കറ്റ് കോർഡിനേറ്റർ എന്ന നിലയിൽ മുൻകാലങ്ങളിൽ നിർണ്ണായക പങ്കുവഹിച്ച അദ്ദേഹം ഇപ്പോഴും കമ്മിറ്റിയംഗമായി ക്ലബ്ബിന്റെ പ്രവർത്തനങ്ങൾക്ക് പിന്തുണ നൽകുന്നു.

2025-ൽ ഫൊക്കാന ന്യൂയോർക്ക് മെട്രോ റീജിയണൽ ജിൻസ് ജോസഫിന്റെ നേതൃത്വത്തിൽ സംഘടിപ്പിച്ച ചാരിറ്റി ക്രിക്കറ്റ് ടൂർണമെന്റ് കായികം വഴി സമൂഹസേവനത്തിന് മാതൃകയായി വൻ വിജയമായിരുന്നു. ഫൊക്കാന 2026-28 വർഷത്തേക്കുള്ള നാഷണൽ കമ്മിറ്റിയിലേക്ക് എല്ലാ പിന്തുണയും ആശംസകളും ഫൊക്കാന ന്യൂയോർക്ക് മെട്രോ റീജിയണൽ വൈസ് പ്രസിഡന്റ് ലാജി തോമസ് അറിയിച്ചു. നൈമയുടെ പിന്തുണ ലഭിച്ചതിൽ സന്തോഷമുണ്ടെന്നും ഏവരുടെയും സഹകരണം പ്രതീക്ഷിക്കുന്നതായും ജിൻസ് ജോസഫ് അറിയിച്ചു.