വാഷിംഗ്ടൺ: ലോക രാജ്യങ്ങൾ ആകാംക്ഷയോടെ ഉറ്റുനോക്കുന്ന കൂടിക്കാഴ്ചക്കായി സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരൻ നാളെ അമേരിക്കയിലെത്തും. വൈറ്റ് ഹൗസിൽ വെച്ച് യു.എസ്. പ്രസിഡന്റ് ഡൊണാൾഡ് ട്രംപുമായി കിരീടാവകാശി കൂടിക്കാഴ്ച നടത്തും. പ്രതിരോധം, സാമ്പത്തിക സഹകരണം, ഊർജ്ജരംഗം, പ്രാദേശിക സുരക്ഷാ വിഷയങ്ങൾ തുടങ്ങിയ നിർണായക വിഷയങ്ങൾ കൂടിക്കാഴ്ചയിൽ ചർച്ചയാകും.
സൗദിയും അമേരിക്കയും തമ്മിലുള്ള തന്ത്രപരമായ ബന്ധം കൂടുതൽ ദൃഢമാക്കുകയാണ് സന്ദർശനത്തിന്റെ പ്രധാന ലക്ഷ്യം. അമേരിക്കൻ പ്രസിഡന്റ് ട്രംപിന്റെ മുൻഗണനാ വിഷയങ്ങളായ ഇസ്രായേലുമായി സൗദി നയതന്ത്രബന്ധം സ്ഥാപിക്കുന്ന 'എബ്രഹാം ഉടമ്പടി'യിൽ സൗദിയെ പങ്കാളിയാക്കാനുള്ള ശ്രമങ്ങളും ചർച്ചയുടെ അജണ്ടയിലുണ്ട്. കൂടാതെ, സൗദിക്ക് എഫ്-35 സ്റ്റെൽത്ത് യുദ്ധവിമാനങ്ങൾ വിൽക്കുന്ന കാര്യത്തിലും കൂടിക്കാഴ്ചയിൽ ധാരണയുണ്ടായേക്കും.
ജമാൽ ഖഷോഗിയുടെ കൊലപാതകത്തിന് ശേഷം സൗദി കിരീടാവകാശി അമേരിക്കയിൽ നടത്തുന്ന ഏറ്റവും പ്രധാനപ്പെട്ടതും ഉന്നതതലത്തിലുള്ളതുമായ സന്ദർശനമാണിത്. കിരീടാവകാശിക്ക് വേണ്ടി വൈറ്റ് ഹൗസിൽ വിപുലമായ സ്വീകരണ ചടങ്ങുകളാണ് ഒരുക്കിയിട്ടുള്ളത്. കൂടിക്കാഴ്ചയ്ക്ക് ശേഷം യു.എസ്.-സൗദി ബിസിനസ് കൗൺസിലിൻ്റെ യോഗത്തിലും അദ്ദേഹം പങ്കെടുക്കാൻ സാധ്യതയുണ്ട്.