ശ്രീനഗർ: ഡൽഹി ചെങ്കോട്ടയ്ക്ക് സമീപം നടന്ന കാർ സ്ഫോടനവുമായി ബന്ധപ്പെട്ട് കശ്മീരിൽ ഒരു വനിതാ ഡോക്ടറെ സുരക്ഷാ ഏജൻസികൾ കസ്റ്റഡിയിലെടുത്തു. സ്ഫോടനത്തിൽ കൊല്ലപ്പെട്ട ചാവേർ ഡോ. ഉമർ മുഹമ്മദിൻ്റെ അടുത്ത സഹായിയാണ് കസ്റ്റഡിയിലായ വനിതാ ഡോക്ടറെന്നാണ് സൂചന. ഇവരുമായി ഉമർ മുഹമ്മദിന് അടുത്ത ബന്ധമുണ്ടായിരുന്നതായും സ്ഫോടനത്തിന് തൊട്ടുമുമ്പ് ഇവർ നിരന്തരം സംസാരിച്ചിരുന്നതായും അന്വേഷണത്തിൽ കണ്ടെത്തിയിരുന്നു.
പുൽവാമ ജില്ലയിലെ ട്രാലിലുള്ള വീട്ടിൽ നിന്നാണ് വനിതാ ഡോക്ടറെ കസ്റ്റഡിയിൽ എടുത്തത്. ഇവരെ ചോദ്യം ചെയ്യുന്നതിനായി രഹസ്യകേന്ദ്രത്തിലേക്ക് മാറ്റിയിട്ടുണ്ട്. ഇവർക്ക് സ്ഫോടനത്തിൻ്റെ ആസൂത്രണത്തിലും ഗൂഢാലോചനയിലും പങ്കുണ്ടോയെന്നത് അന്വേഷണ സംഘം പരിശോധിക്കുകയാണ്.
നേരത്തെ, സ്ഫോടനത്തിൻ്റെ മുഖ്യ സൂത്രധാരനും ചാവേറുമായി കരുതുന്ന ഡോ. ഉമർ മുഹമ്മദിൻ്റെ പുൽവാമയിലെ വീട് സൈന്യം തകർത്തിരുന്നു. സ്ഫോടനവുമായി ബന്ധപ്പെട്ട് ഉമറുമായി അടുപ്പമുള്ള നിരവധി പേർ ഇതിനോടകം അറസ്റ്റിലായിട്ടുണ്ട്. ജെയ്‌ഷെ മുഹമ്മദ് (ജെ.ഇ.എം) ഭീകരസംഘടനയുടെ 'വൈറ്റ് കോളർ' മൊഡ്യൂളിലെ പ്രധാനിയായിരുന്നു ഡോ. ഉമർ മുഹമ്മദ്.