ന്യൂഡൽഹി: രാജ്യതലസ്ഥാനത്തെ ഞെട്ടിച്ച് ചെങ്കോട്ട മെട്രോ സ്റ്റേഷന് സമീപം വൻ സ്ഫോടനം. ഇന്ന് രാത്രി ഏഴ് മണിയോടെ ചെങ്കോട്ട മെട്രോ സ്റ്റേഷന്റെ ഒന്നാം നമ്പർ ഗേറ്റിന് സമീപം നിർത്തിയിട്ടിരുന്ന കാറിലാണ് ശക്തമായ സ്ഫോടനമുണ്ടായത്. അപകടത്തിൽ 13 പേർ മരിച്ചതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. 30-ൽ അധികം പേർക്ക് പരിക്കേറ്റിട്ടുണ്ട്, ഇതിൽ എട്ട് പേരുടെ നില ഗുരുതരമാണ്.
സ്ഫോടനത്തിന്റെ ആഘാതത്തിൽ കാർ പൂർണ്ണമായി പൊട്ടിത്തെറിക്കുകയും സമീപത്തുണ്ടായിരുന്ന മൂന്നിലധികം വാഹനങ്ങൾ കത്തിനശിക്കുകയും ചെയ്തു. ഏകദേശം 50 ഓളം വാഹനങ്ങൾക്ക് കേടുപാടുകൾ സംഭവിച്ചിട്ടുണ്ട്. സ്ഫോടകവസ്തുക്കൾ ഉപയോഗിച്ചുള്ള ആക്രമണമാണോ എന്ന് പരിശോധിച്ചുവരികയാണെന്ന് ഡൽഹി പോലീസ് വ്യക്തമാക്കി.

സംഭവത്തെ തുടർന്ന് മേഖലയിൽ പരിഭ്രാന്തി പരന്നു. ഉടൻ തന്നെ ഡൽഹി അഗ്നിരക്ഷാസേനയുടെ ഇരുപതോളം യൂണിറ്റുകളെത്തി രക്ഷാപ്രവർത്തനം നടത്തി തീ നിയന്ത്രണവിധേയമാക്കി. പരിക്കേറ്റവരെ ലോക് നായിക് ജയപ്രകാശ് (എൽ.എൻ.ജെ.പി.) ആശുപത്രിയിൽ പ്രവേശിപ്പിച്ചു. സ്ഥിതിഗതികൾ വിലയിരുത്തുന്നതിനായി കേന്ദ്ര ആഭ്യന്തരമന്ത്രി അമിത് ഷാ ഡൽഹി പോലീസ് കമ്മീഷണറുമായും ഇന്റലിജൻസ് ബ്യൂറോ ഡയറക്ടറുമായും സംസാരിച്ചു. എൻ.ഐ.എ., എൻ.എസ്.ജി., ഫോറൻസിക് വിദഗ്ധർ എന്നിവരുടെ സംഘങ്ങൾ സ്ഥലത്തെത്തി പരിശോധന ആരംഭിച്ചു. ഉത്തർപ്രദേശ്, മുംബൈ ഉൾപ്പെടെയുള്ള നഗരങ്ങളിലും അതീവ ജാഗ്രതാ നിർദേശം നൽകിയിട്ടുണ്ട്. ഉയർന്ന സുരക്ഷയുള്ള രാജ്യതലസ്ഥാനത്തെ തന്ത്രപ്രധാനമായ സ്ഥലത്ത് സ്ഫോടനമുണ്ടായത് വലിയ സുരക്ഷാ ആശങ്കകൾക്ക് വഴിവെച്ചിട്ടുണ്ട്.