കോട്ടയം: ശരീരത്തിൽ നിന്ന് ദുരാത്മാക്കളെ ഒഴിപ്പിക്കാനെന്ന പേരിൽ യുവതിക്ക് ഭർതൃവീട്ടിൽ ക്രൂരമായ പീഡനം. കോട്ടയം തിരുവഞ്ചൂരിൽ നടന്ന സംഭവത്തിൽ യുവതിയുടെ ഭർത്താവും ഭർതൃപിതാവും ഉൾപ്പെടെ മൂന്ന് പേരെ മണർകാട് പോലീസ് അറസ്റ്റ് ചെയ്തു. ഈ മാസം രണ്ടാം തീയതിയാണ് കേസിനാസ്പദമായ സംഭവം നടന്നത്.
യുവതിക്ക് പത്ത് മണിക്കൂറോളം നേരമാണ് ക്രൂരമായ ആഭിചാരക്രിയയ്ക്ക് വിധേയമാകേണ്ടി വന്നതെന്ന് പോലീസ് അറിയിച്ചു. യുവതിക്ക് നിർബന്ധിച്ച് മദ്യം നൽകുകയും ബീഡി വലിപ്പിക്കുകയും ഭസ്മം തീറ്റിക്കുകയും ചെയ്തു. ഇതിനു പുറമേ, യുവതിയുടെ ശരീരത്തിൽ പൊള്ളൽ ഏൽപ്പിക്കുകയും ചെയ്തുവെന്ന് പോലീസ് പറഞ്ഞു.
ഭർത്താവ് അഖിൽ, ഭർതൃപിതാവ് ദാസ്, ആഭിചാരക്രിയ നടത്തിയ ശിവദാസ് എന്നിവരാണ് അറസ്റ്റിലായത്. ഇവരെ റിമാൻഡ് ചെയ്തു. യുവതിയുടെ കുടുംബം നൽകിയ പരാതിയിലാണ് പോലീസ് നടപടി സ്വീകരിച്ചത്. സംഭവത്തിൽ ഉൾപ്പെട്ട ഭർതൃമാതാവ് ഒളിവിലാണെന്നും അവർക്കായി അന്വേഷണം ഊർജ്ജിതമാക്കിയതായും പോലീസ് വ്യക്തമാക്കി. അന്ധവിശ്വാസങ്ങളുടെ പേരിൽ നടന്ന ഈ ക്രൂരകൃത്യം സമൂഹത്തിൽ വലിയ ഞെട്ടലാണ് ഉണ്ടാക്കിയിരിക്കുന്നത്.