അമേരിക്കൻ ഫെഡറൽ സർക്കാരിന്റെ അടച്ചുപൂട്ടൽ 35-ാം ദിവസത്തിലേക്ക് കടന്നതോടെ, രാജ്യത്തിന്റെ ചരിത്രത്തിലെ ഏറ്റവും ദൈർഘ്യമേറിയ 'ഗവൺമെന്റ് ഷട്ട്ഡൗൺ' എന്ന റെക്കോർഡ് മറികടക്കാനുള്ള ഒരുക്കത്തിലാണ് യു.എസ്. കോൺഗ്രസിലെ റിപ്പബ്ലിക്കൻ-ഡെമോക്രാറ്റ് പാർട്ടികൾ തമ്മിലുള്ള ധനാനുമതി തർക്കമാണ് പ്രതിസന്ധിക്ക് കാരണം. നിലവിൽ 2018-2019 കാലയളവിൽ ഡൊണാൾഡ് ട്രംപിന്റെ ആദ്യ ഭരണത്തിൽ സംഭവിച്ച 35 ദിവസം നീണ്ട അടച്ചുപൂട്ടലാണ് ഏറ്റവും ദൈർഘ്യമേറിയത്.
ഈ ദിവസം ആ റെക്കോർഡിനൊപ്പമെത്തും. ആരോഗ്യ പരിരക്ഷാ പദ്ധതിയായ 'അഫോർഡബിൾ കെയർ ആക്ട്' (ഒബാമകെയർ) സബ്‌സിഡികളുടെ കാലാവധി നീട്ടണമെന്ന ഡെമോക്രാറ്റുകളുടെ ആവശ്യം ധനാനുമതി ബില്ലിൽ ഉൾപ്പെടുത്താൻ റിപ്പബ്ലിക്കൻ പാർട്ടി വിസമ്മതിച്ചതാണ് ഇപ്പോഴത്തെ പ്രതിസന്ധിക്ക് മൂലകാരണം. സർക്കാർ പ്രവർത്തനങ്ങൾക്കുള്ള ഫണ്ടിംഗ് ബിൽ സെനറ്റിൽ ഇതുവരെ 13 തവണയാണ് പരാജയപ്പെട്ടത്. ബിൽ പാസാകാൻ 60 വോട്ടുകൾ ആവശ്യമാണ്. ഏകദേശം ഏഴര ലക്ഷത്തോളം ഫെഡറൽ ജീവനക്കാർ നിർബന്ധിത അവധിയിലാണ്.
ഇവർക്ക് ശമ്പളം ലഭിക്കുന്നില്ല. ഏഴ് ലക്ഷത്തി മുപ്പതിനായിരം ജീവനക്കാർ വിമാനത്താവളങ്ങൾ, നിയമപാലനം തുടങ്ങിയ അവശ്യ സർവീസുകളിൽ ശമ്പളമില്ലാതെ ജോലി ചെയ്യാൻ നിർബന്ധിതരാകുകയാണ്. സാമ്പത്തിക വിദഗ്ധരുടെ കണക്കനുസരിച്ച്, ഈ അടച്ചുപൂട്ടൽ രാജ്യത്തിന്റെ സമ്പദ്‌വ്യവസ്ഥയ്ക്ക് കോടിക്കണക്കിന് ഡോളറിന്റെ നഷ്ടമാണ് ഉണ്ടാക്കുന്നത്. ദശലക്ഷക്കണക്കിന് കുറഞ്ഞ വരുമാനക്കാരായ അമേരിക്കക്കാർ ആശ്രയിക്കുന്ന ഭക്ഷ്യസഹായ പദ്ധതിയായ SNAP ഉൾപ്പെടെയുള്ള അവശ്യ സർക്കാർ സേവനങ്ങൾ തടസ്സപ്പെടുന്നതും സാധാരണ ജനങ്ങളെ പ്രതിസന്ധിയിലാക്കുന്നുണ്ട്. ഫണ്ട് അനുവദിക്കാനുള്ള നിയമനിർമ്മാണത്തിൽ 'ഫിലിബസ്റ്റർ' അവസാനിപ്പിക്കാൻ സെനറ്റിലെ റിപ്പബ്ലിക്കൻ നേതാക്കൾക്ക് മേൽ ട്രംപ് സമ്മർദ്ദം ചെലുത്തുന്നതായും റിപ്പോർട്ടുകളുണ്ട്.