വാഷിംഗ്ടൻ: തീരുവ കാണിച്ചു ഭീഷണി തുടർന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇത്തവണ ചൈനയെ ഭീഷണിപ്പെടുത്തിയാണ് രംഗത്തെത്തിയിരിക്കുന്നത്. യുഎസ്സുമായുള്ള ന്യായമായ വ്യാപാര കരാറിൽ ഒപ്പു വെച്ചില്ലെങ്കിൽ ചൈനയ്ക്ക് മേൽ 155 ശതമാനം തീരുവ ചുമത്തും എന്നാണ് ട്രംപിന്റെ ഭീഷണി. വൈറ്റ് ഹൗസിൽ വെച്ച് ഓസ്ട്രേലിയൻ പ്രധാനമന്ത്രി ആന്റണി അൽബനീസുമായി നിർണായക ധാതു കരാറിൽ ട്രംപ് ഒപ്പുവെച്ച ശേഷം ആയിരുന്നു പ്രസ്താവന. ചൈന നമ്മുടെ വളരെ ബഹുമാനം കാണിക്കുന്നുണ്ടെന്നാണ് താൻ കരുതുന്നത്. താരിഫുകളുടെ രൂപത്തിൽ അവർ നമ്മൾക്ക് വലിയ ബാധ്യത നൽകുന്നുണ്ട്.

അവർക്ക് നിലവിൽ 55% താരിഫ് ആണ് ചുമത്തുന്നത്. അത് വളരെ വലിയ തുകയാണ്. യുഎസുമായി ന്യായമായ വ്യാപാര കരാറിൽ ഏർപ്പെട്ടിട്ടില്ലെങ്കിൽ ചൈന നൽകുന്ന 55 ശതമാനം താരിഫ് നവംബർ ഒന്നു മുതൽ 155 ശതമാനം ആയി ഉയർത്തുമെന്നാണ് ട്രമ്പ് വ്യക്തമാക്കിയത്. അമേരിക്ക നിരവധി രാജ്യങ്ങളുമായി വ്യാപാര കരാർ ഉണ്ടാക്കിയിട്ടുണ്ടെന്നും ആ രാജ്യങ്ങൾ മുതലെടുപ്പ് നടത്തിയതായും അദ്ദേഹം ആരോപിച്ചു. ചൈനീസ് പ്രസിഡന്റ് ഷി ജിൻപിങ്ങുമായി വളരെ ന്യായമായ ഒരു വ്യാപാര കരാർ ഉണ്ടാക്കാൻ സാധിക്കുമെന്നാമ് താൻ പ്രതീക്ഷിക്കുന്നുതെന്നും ട്രംപ്. നവംബർ 1 മുതൽ ചൈനയിൽ നിന്നുള്ള ഉൽപ്പന്നങ്ങൾക്ക് 100 ശതമാനം തീരുവ ചുമത്തുമെന്ന് ട്രംപ് നേരത്തെയും പ്രഖ്യാപനം നടത്തിയിരുന്നു.