തിരുവനന്തപുരം: തിന്മയുടെ മേൽ നന്മ നേടിയ വിജയത്തിൻ്റെയും, ഐശ്വര്യത്തിൻ്റെയും പ്രതീകമായ ദീപാവലി ആഘോഷത്തിൻ്റെ നിറവിലാണ് ഇന്ന് രാജ്യം. തുലാമാസത്തിലെ അമാവാസി ദിനമായ ഇന്ന്, ഭാരതം മുഴുവൻ ദീപങ്ങൾ തെളിയിച്ചും മധുരം പങ്കുവെച്ചും സന്തോഷം കൈമാറുകയാണ്. കേരളത്തിലും ദീപാവലി ചടങ്ങുകളോടെ ആഘോഷിക്കുകയാണ്.

ഉത്തരേന്ത്യയിൽ ശ്രീരാമൻ 14 വർഷത്തെ വനവാസത്തിനുശേഷം അയോധ്യയിൽ തിരിച്ചെത്തിയതിൻ്റെ സ്മരണ പുതുക്കിയാണ് ദീപാവലി ആഘോഷിക്കുന്നതെങ്കിൽ, കേരളത്തിലും ദക്ഷിണേന്ത്യൻ സംസ്ഥാനങ്ങളിലും പ്രധാനമായും നരക ചതുർദശി സങ്കൽപ്പത്തിനാണ് പ്രാധാന്യം. ഭഗവാൻ ശ്രീകൃഷ്ണൻ, അസുരനായ നരകാസുരനെ വധിച്ചതിലൂടെ തിന്മയുടെ മേൽ നന്മ വിജയം നേടിയതിൻ്റെ ആഘോഷമായാണ് ഈ ദിനം കണക്കാക്കുന്നത്.