കരൂർ ദുരന്തത്തിൽ തമിഴ്നാട് സർക്കാർ നിയോഗിച്ച ജുഡീഷ്യൽ കമ്മീഷന്റെ അന്വേഷണം തടഞ്ഞ് ഹൈക്കോടതി. രേഖകൾ സിബിഐക്ക് കൈമാറാനും സിബിഐ അന്വേഷണത്തോട് സർക്കാർ പൂർണമായും സഹകരിക്കണമെന്നും സുപ്രീംകോടതി ഉത്തരവിൽ നിർദേശം. സർക്കാർ നിയോഗിച്ച വിരമിച്ച ജസ്റ്റിസ് അരുണ ജഗദീശന്റെ നേതൃത്വത്തിലുള്ള ജുഡീഷ്യൽ കമ്മീഷന്റെ അന്വേഷണമാണ് സുപ്രീംകോടതി തടഞ്ഞത്. പ്രതിമാസം സിബിഐ അന്വേഷണ പുരോഗതി റിപ്പോർട്ട് മേൽനോട്ട സമിതിക്ക് സമർപ്പിക്കണമെന്നും ഉത്തരവിൽ പറയുന്നു. കേസിൽ സിബിഐ അന്വേഷണം വേണ്ടെന്ന തമിഴ്നാട് സർക്കാരിന്റെ നിലപാടിന് തിരിച്ചടിയാണ് സുപ്രീംകോടതിയുടെ ഈ വിധി.
41 പേർ മരിച്ച അപകടത്തിൽ നീതിയുക്തവും നിഷ്പക്ഷവുമായ അന്വേഷണം പൗരന്മാരുടെ അവകാശമാണെന്ന് നിരീക്ഷിച്ചാണ് സുപ്രീംകോടതി ഉത്തരവിട്ടത്. ദുരന്തത്തിൽ പ്രത്യേക അന്വേഷണ സംഘത്തെ നിയോഗിച്ച മദ്രാസ് ഹൈക്കോടതി സിംഗിൾ ബെഞ്ച് ഉത്തരവ് റദ്ദാക്കിക്കൊണ്ടാണ് അന്വേഷണം സുപ്രീംകോടതി സിബിഐക്ക് കൈമാറിയത്. സിബിഐ അന്വേഷണത്തിന് വിരമിച്ച സുപ്രീംകോടതി ജഡ്ജി അജയ് റസ്തോഗിയുടെ നേതൃത്വത്തിൽ, രണ്ട് ഐപിഎസ് ഉദ്യോഗസ്ഥർ അടങ്ങിയ സമിതി മേൽനോട്ടം വഹിക്കും.
സുപ്രീംകോടതിയുടെ ഉത്തരവിൽ മദ്രാസ് ഹൈക്കോടതിയുടെ നടപടികൾക്ക് വിമർശനമുണ്ട്. സാധാരണ റിട്ട് ഹർജിയെ ക്രിമിനൽ റിട്ട് ഹർജിയായി രജിസ്റ്റർ ചെയ്തതിനെതിരെ സുപ്രീംകോടതി മദ്രാസ് ഹൈക്കോടതി രജിസ്ട്രാർ ജനറലിനോട് റിപ്പോർട്ട് തേടി. കേസിലെ പൂർണ്ണ വസ്തുതകൾ പരിശോധിക്കാതെയാണ് മദ്രാസ് ഹൈക്കോടതി പ്രത്യേക അന്വേഷണ സംഘത്തെ നിയോഗിച്ചതെന്നും കോടതി വിമർശിച്ചു.