വാഷിങ്ടൺ: അമേരിക്കയിലെ ഡാളസിൽ ഇന്ത്യൻ വിദ്യാർത്ഥി വെടിയേറ്റ് മരിച്ചു. ഹൈദരാബാദ് സ്വദേശിയായ ചന്ദ്രശേഖർ പോൾ (27) ആണ് കൊല്ലപ്പെട്ടത്. ഇന്നലെ രാത്രിയോടെയാണ് സംഭവം. ഗ്യാസ് സ്റ്റേഷനിൽ ജോലി ചെയ്യുന്നതിനിടെ അജ്ഞാതരായ തോക്കുധാരികൾ യുവാവിന് നേരെ വെടിയുതിർക്കുകയായിരുന്നു. ആക്രമണത്തിന്റെ കാരണം ഇതുവരെ വ്യക്തമല്ല.

ഹൈദരാബാദിൽ നിന്നും ദന്തിസ്റ്റായി ബിരുദം നേടിയ ശേഷമാണ് ചന്ദ്രശേഖർ പോൾ ഉന്നത പഠനത്തിനായി അമേരിക്കയിലെത്തിയത്. യുഎസിൽ ബിരുദാനന്തര ബിരുദ പഠനം അദ്ദേഹം ആറ് മാസം മുൻപ് പൂർത്തിയാക്കിയിരുന്നു. ഇതിന് പിന്നാലെ പാർട്ട് ടൈമായിട്ട് ഗ്യാസ് സ്റ്റേഷനിൽ ജോലി ചെയ്തുവരികയായിരുന്നു.

വെടിയേറ്റു മരിച്ച ഇന്ത്യൻ വിദ്യാർത്ഥി ചന്ദ്രശേഖർ പോളിന്റെ മൃതദേഹം അമേരിക്കയിൽ നിന്ന് നാട്ടിലെത്തിക്കാനുള്ള നടപടികൾ തുടരുകയാണ്. ഇതിനായി യുവാവിന്റെ കുടുംബം സർക്കാർ സഹായം തേടിയിട്ടുണ്ട്. ഹൈദരാബാദിലെ വിദ്യാർത്ഥിയുടെ കുടുംബത്തെ ബിആർഎസ് എംഎൽഎ സുധീർ റെഡ്ഡിയും മുൻ മന്ത്രി ടി ഹരീഷ് റാവുവും സന്ദർശിച്ചു. കുടുംബത്തിന് അനുശോചനം അറിയിച്ചുകൊണ്ട് ടി ഹരീഷ് റാവു സമൂഹ മാധ്യമ പോസ്റ്റിൽ ഇങ്ങനെ കുറിച്ചു: “വലിയ ഉയരങ്ങളിലെത്തുമെന്ന് വിശ്വസിച്ചിരുന്ന മകൻ ഇനി ഇല്ലെന്ന് അറിയുമ്പോൾ മാതാപിതാക്കൾ അനുഭവിക്കുന്ന വേദനയ്ക്ക് സാക്ഷ്യം വഹിക്കുന്നത് ഹൃദയഭേദകമാണ്.” ചന്ദ്രശേഖറിന്റെ മൃതദേഹം എത്രയും വേഗം നാട്ടിലെത്തിക്കാനുള്ള നടപടികൾ സംസ്ഥാന സർക്കാരിന്റെ ഭാഗത്തുനിന്നുണ്ടാകുമെന്ന് അദ്ദേഹം ഉറപ്പ് നൽകി.