ന്യൂഡൽഹി: ലോക ഭൂപടത്തിൽ തുടരണമെങ്കിൽ ഭീകരതയെ പിന്തുണയ്ക്കുന്നത് ഉടനടി അവസാനിപ്പിക്കണം എന്ന് പാക്കിസ്ഥാന് കരസേനാ മേധാവി ജനറൽ ഉപേന്ദ്ര ദ്വിവേദിയുടെ കർശന മുന്നറിയിപ്പ്. ഭാവിയിൽ, സംഘർഷങ്ങളോടുള്ള ഇന്ത്യയുടെ സമീപനം 'ഓപ്പറേഷൻ സിന്ദൂരിനേക്കാൾ' ആക്രമണാത്മകമായിരിക്കും എന്നും കരസേനാ മേധാവി വ്യക്തമാക്കി.
ഇന്ത്യ ഒരു രാജ്യം എന്ന നിലയിൽ പൂർണ്ണമായും തയ്യാറാണ് എന്ന് കരസേനാ മേധാവി ജനറൽ ഉപേന്ദ്ര ദ്വിവേദി വ്യക്തമാക്കി."ഓപ്പറേഷൻ സിന്ദൂറിന്റെ സമയത്ത് കാണിച്ച സംയമനം ഇനി കാണിക്കില്ല. ഭീകരതയെ പിന്തുണയ്ക്കുന്നത് അവസാനിപ്പിച്ചില്ലെങ്കിൽ, ലോക ഭൂപടത്തിൽ തുടരണോ വേണ്ടയോ എന്ന് പാകിസ്ഥാനെ ചിന്തിപ്പിക്കുന്ന രീതിയിലായിരിക്കും ഇന്ത്യയുടെ നടപടി," അദ്ദേഹം മുന്നറിയിപ്പ് നൽകി. രാജസ്ഥാനിലെ ശ്രീഗംഗാനഗറിൽ സൈനികരോട് സംസാരിക്കുകയായിരുന്നു ജനറൽ ഉപേന്ദ്ര ദ്വിവേദി.
ഓപ്പറേഷൻ സിന്ദൂരിനിടെ പാക്കിസ്ഥാനിലെ ഭീകര താവളങ്ങളുടെ തെളിവുകൾ ഇന്ത്യ ഹാജരാക്കിയിട്ടുണ്ടെന്നും, അല്ലാത്തപക്ഷം പാക്കിസ്ഥാൻ സത്യം മറച്ചുവെക്കുമായിരുന്നു എന്നും കരസേനാ മേധാവി പറഞ്ഞു. 26 പേരുടെ ജീവനെടുത്ത പഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ സൈനിക നടപടിയിൽ ലോകം മുഴുവൻ ഇന്ത്യയ്‌ക്കൊപ്പം നിന്നു എന്നും അദ്ദേഹം ചൂണ്ടിക്കാട്ടി.