വാഷിങ്ടൺ: യുഎസിലെ മിഷിഗണിൽ ക്രിസ്ത്യൻ പള്ളിക്ക് നേരെ നടന്ന വെടിവയ്പ്പിൽ പ്രസിഡന്റ് ഡൊണാൾഡ് ട്രംപ് ശക്തമായി അപലപിച്ചു. ഇത് അമേരിക്കയിലെ ക്രിസ്ത്യാനികൾക്കെതിരായ ആസൂത്രിത ആക്രമണമാണെന്ന് അഭിപ്രായപ്പെട്ട അദ്ദേഹം കൊല്ലപ്പെട്ടവരുടെ കുടുംബാംഗങ്ങൾക്ക അനുശോചനം അറിയിച്ചു. സംഭവത്തെക്കുറിച്ച് ഇനിയും ഒരുപാട് കാര്യങ്ങൾ പഠിക്കാനുണ്ട്. എന്നാൽ ഇത് അമേരിക്കൻ ഐക്യനാടുകളിലെ ക്രിസ്ത്യാനികളെ ലക്ഷ്യം വെച്ചുള്ള മറ്റൊരു ആക്രമണം കൂടിയാണ്. നമ്മുടെ രാജ്യത്തെ ബാധിച്ചിരിക്കുന്ന ഈ അക്രമ പകർച്ചവ്യാധി ഉടൻ അവസാനിപ്പിക്കണമെന്നും ട്രംപ് കൂട്ടിച്ചേർത്തു.

മിഷിഗണിലെ ഗ്രാൻഡ് ബ്ലാങ്കിലുള്ള ദി ചർച്ച് ഓഫ് ജീസസ് ക്രൈസ്റ്റ് ഓഫ് ലാറ്റർ-ഡേ സെയിന്റ്സിലാണ് വെടിവെപ്പ് ഉണ്ടായത്. ഞായറാഴ്ച്ച പ്രാർഥന നടക്കുന്നതിനിടെയായിരുന്നു ആക്രമണം നടന്നത്. വാഹനത്തിലെത്തിയ അക്രമി തന്റെ ട്രക്ക് പള്ളിക്കകത്തേക്ക് ഇടിച്ചു കയറ്റുകയായിരുന്നു. ശേഷം വണ്ടിയിൽ നിന്നും പുറത്തിറങ്ങി വിശ്വാസികൾക്ക് നേരെ വെടിയുതിർക്കുകയായിരുന്നു.

വെടിവയ്പ്പിന് ശേഷം ഇയാൾ പള്ളിക്ക് തീവെക്കുകയും ചെയ്തതായി റിപ്പോർട്ട്. തീ ആളിപ്പടർന്നതോടെ രക്ഷാപ്രവർത്തനം ദുഷ്കരമാക്കിയതായും പൊലീസ് അറിയിച്ചു. തുടർന്ന് അഗ്നിശമന സേനാംഗങ്ങൾ എത്തിയാണ് തീ നിയന്ത്രണവിധേയമാക്കിയത്. അക്രമം അഴിച്ചുവിട്ടത് ബർട്ടൺ സ്വദേശിയായ ഒരു നാല്പതുകാരനാണെന്ന് മിഷിഗൺ പൊലീസ് അറിയിച്ചു. ഇയാളെ പിന്നീട് പൊലീസ് വധിച്ചുവെന്ന് റിപ്പോർട്ടുകളുണ്ട്.