എൻ.എസ്.എസ്. ജനറൽ സെക്രട്ടറി സുകുമാരൻ നായർക്ക് പിന്തുണ പ്രഖ്യാപിച്ച് മന്ത്രി കെ.ബി. ഗണേഷ്‌കുമാർ. ചങ്ങനാശ്ശേരിയിലെ ഏതാനും ചില നായന്മാർ എൻ.എസ്.എസ്സിൽ നിന്ന് രാജിവെച്ചാൽ, കേരളത്തിലെ മുഴുവൻ നായന്മാരും രാജിവെച്ചു എന്ന് അതിനർത്ഥമില്ലെന്ന് ഗണേഷ്‌കുമാർ പറഞ്ഞു. ഇത്തരക്കാർ എൻ.എസ്.എസ്സിന് എതിരാണെന്നും, സുകുമാരൻ നായർ ഏറ്റവും കരുത്തുറ്റ ജനറൽ സെക്രട്ടറിയാണെന്നും മന്ത്രി അഭിപ്രായപ്പെട്ടു. അദ്ദേഹത്തിന് പിന്നിൽ പാറ പോലെ ഉറച്ചുനിൽക്കുമെന്നും ഗണേഷ്‌കുമാർ വ്യക്തമാക്കി.
പത്തനാപുരം എൻ.എസ്.എസ് താലൂക്ക് യൂണിയൻ പ്രസിഡന്റായി വീണ്ടും തിരഞ്ഞെടുക്കപ്പെട്ട വേദിയിൽ വെച്ചായിരുന്നു മന്ത്രി കെ.ബി. ഗണേഷ്‌കുമാറിന്റെ പ്രസ്താവന. സുകുമാരൻ നായരുടെ നിലപാടുകൾ രാഷ്ട്രീയമല്ലെന്നും എൻ.എസ്.എസ്. സമദൂര സിദ്ധാന്തത്തിൽ തന്നെയാണ് മുന്നോട്ട് പോകുന്നതെന്നും മന്ത്രി വ്യക്തമാക്കി. ഒരാൾ അഭിപ്രായം പറയരുത് എന്ന് പറയുന്നത് ശരിയല്ല.
കഴിഞ്ഞ ദിവസം അദ്ദേഹം സർക്കാരിനെക്കുറിച്ച് നല്ല അഭിപ്രായം പറഞ്ഞു. എന്നാൽ, അതിനുമുമ്പ് ഇതേ സർക്കാരിനെതിരെയും, മുൻപ് യു.ഡി.എഫ് സർക്കാരിനെയും കേന്ദ്ര സർക്കാരുകളെയും എതിർത്തും ജനറൽ സെക്രട്ടറി നിലപാട് പറഞ്ഞിട്ടുണ്ട്. അതാത് കാലഘട്ടങ്ങളിൽ എൻ.എസ്.എസ്സുമായി ബന്ധപ്പെട്ട കാര്യങ്ങളാണ് അദ്ദേഹം പറയുന്നത്, അല്ലാതെ രാഷ്ട്രീയ നിലപാടുകളല്ല. എൻ.എസ്.എസ്സിന്റെ നിലപാട് എക്കാലത്തും ജനറൽ സെക്രട്ടറി വ്യക്തമാക്കാറുണ്ടെന്നും മന്ത്രി കൂട്ടിച്ചേർത്തു.
എൻ.എസ്.എസ്. പ്രതിനിധി സഭായോഗത്തിൽ പോലും ആരും സുകുമാരൻ നായരെ ചോദ്യം ചെയ്തിട്ടില്ലെന്നും, എല്ലാവരും അദ്ദേഹത്തിന്റെ നിലപാടുകളെ സ്വീകരിക്കുകയാണുണ്ടായതെന്നും ഗണേഷ്‌കുമാർ പറഞ്ഞു. എൻ.എസ്.എസ്സിന് എതിരായ എല്ലാ കേസുകളും നടക്കുന്നത് പത്തനംതിട്ട ജില്ലയിലാണെന്നും മന്ത്രി ചൂണ്ടിക്കാട്ടി. 250 രൂപ കൊടുത്താൽ ആർക്കും ഫ്ലെക്‌സ് വെക്കാനും ആരുടെ പേര് വേണമെങ്കിലും എഴുതാനും സാധിക്കും. അത്തരം ട്രോളുകൾ ഉണ്ടാക്കി പ്രചരിപ്പിക്കുന്നത് പോലുള്ള കാര്യങ്ങൾ ചെയ്യാതിരിക്കുക. സുകുമാരൻ നായരുടെ കൈകളിൽ കറ പുരണ്ടിട്ടില്ല, അദ്ദേഹം അഴിമതിക്കാരനല്ല. മന്നത്ത് പത്മനാഭൻ നയിച്ച വഴിയിലൂടെ എൻ.എസ്.എസ്സിനെ കൊണ്ടുപോകുന്നയാളാണ് സുകുമാരൻ നായർ എന്നും ഗണേഷ്‌കുമാർ കൂട്ടിച്ചേർത്തു.