ന്യൂഡൽഹി: ഇന്ത്യയും പാക്കിസ്ഥാനും തമ്മിലുള്ള പ്രശ്നങ്ങളിൽ മൂന്നാം കക്ഷിയുടെ മധ്യസ്ഥത ഉണ്ടായിട്ടില്ലെന്ന് ആവർത്തിച്ച് ഇന്ത്യ. പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, പാക് ആർമി ചീഫ് ഫീൽഡ് മാർഷൽ അസിം മുനീർ, യുഎസ് പ്രസിഡന്റ് ഡൊണാൾഡ് ട്രംപ് എന്നിവർ തമ്മിലുള്ള കൂടിക്കാഴ്ച്ചയ്ക്കു പിന്നാലെയാണ് വിദേശകാര്യമന്ത്രാലയം വീണ്ടും നിലപാട് ആവർത്തിച്ചത്. നിലനിൽക്കുന്ന എല്ലാ പ്രശ്നങ്ങളും ഉഭയകക്ഷിപരമായി പരിഹരിക്കേണ്ടതാണെന്നും മന്ത്രാലയം വ്യക്തമാക്കി.
ഇന്ത്യയും പാകിസ്ഥാനും തമ്മിലുള്ള യുദ്ധം താൻ അവസാനിപ്പിച്ചതായി ഡൊണാൾഡ് ട്രംപ് ഐക്യരാഷ്ട്രസഭയെ അറിയിച്ചതിനു പിന്നാലെയാണ് ഈ കൂടിക്കാഴ്ച നടന്നത്. ജനുവരിയിൽ അധികാരമേറ്റ ശേഷം പരിഹരിച്ചതായി അവകാശപ്പെടുന്ന ഏഴ് സംഘർഷങ്ങളിൽ ഒന്നായാണ് ഇന്ത്യയും പാക്കിസ്ഥാനും തമ്മിലുള്ള സംഘർഷത്തെ ട്രംപ് അവതരിപ്പിച്ചത്.
തന്റെ ഇടപെടൽ ആയിരക്കണക്കിന് ജീവൻ രക്ഷിച്ചു എന്നും, അതിനാൽ ന്നെ താൻ സമാധാനത്തിനുള്ള നോബേൽ സമ്മാനത്തിന് അർഹനാണെന്നുമായിരുന്നു ട്രംപിന്റെ അവകാശവാദങ്ങൾ. യുഎസ് പ്രസി‍‍‍ഡന്റിന്റെ ഈ പ്രസ്താവന അന്നു തന്നെ ഇന്ത്യ എതിർത്തിരുന്നു. ഓപ്പറേഷൻ സിന്ദൂർ അവസാനിപ്പിക്കാനുള്ള തീരുമാനം ഇസ്ലാമാബാദിന്റെ അഭ്യർത്ഥനയെത്തുടർന്നാണെന്നും അമേരിക്കയുടെ സമ്മർദ്ദത്തിന് വഴങ്ങിയല്ലെന്നും ഇന്ത്യ ഇതിനോടകം തന്നെ വ്യക്തമാക്കിയതാണ്.
കാശ്മീർ ഉൾപ്പെടെയുള്ള പാകിസ്ഥാനുമായുള്ള തർക്കങ്ങളിൽ ബാഹ്യ ഇടപെടലുണ്ടാകുന്നതിനെ ന്യൂഡൽഹി പലതവണ ശക്തമായി തള്ളിക്കളഞ്ഞിട്ടുണ്ട്. ഇന്ത്യയിലെ തുടർച്ചയായ സർക്കാരുകൾ ഊന്നിപ്പറയുന്നത്, ഇനിയൊരു ചർച്ച നടക്കുകയാണെങ്കിൽ അത് നേരിട്ടുള്ളതും കർശനമായി ദ്വിപക്ഷീയവുമായിരിക്കണം എന്നതാണ്.