അയോധ്യ വിധിയിൽ വിവാദ പ്രസ്താവനയുമായി സുപ്രീംകോടതി മുൻ ചീഫ് ജസ്റ്റിസ് ഡി.വൈ. ചന്ദ്രചൂഡ്. ബാബറി മസ്ജിദിന്റെ നിർമ്മാണം അടിസ്ഥാനപരമായി ഒരു അവഹേളനമായിരുന്നുവെന്ന് അദ്ദേഹം അഭിപ്രായപ്പെട്ടു. നേരത്തെ ഉണ്ടായിരുന്ന നിർമിതി തകർത്തു കൊണ്ടാണ് പള്ളി നിർമ്മിച്ചതെന്നും, ഹിന്ദുക്കൾ അവിടെ ആരാധന നടത്തിയിരുന്നു എന്നതിന് പുരാവസ്തു വകുപ്പിന്റെ തെളിവുകളുണ്ടെന്നും ചന്ദ്രചൂഡ് പറഞ്ഞു.

പുരാവസ്തു വകുപ്പിന്റെ (ആർക്കിയോളജിക്കൽ സർവ്വെ) റിപ്പോർട്ടിൽ ക്ഷേത്രാവശിഷ്ടങ്ങൾ കണ്ടെത്തിയതായി രേഖപ്പെടുത്തിയിട്ടുണ്ടെന്നാണ് ചന്ദ്രചൂഡിന്റെ പുതിയ അവകാശവാദം. 'ന്യൂസ് ലോൺട്രി'ക്ക് നൽകിയ അഭിമുഖത്തിലാണ് ചന്ദ്രചൂഡിന്റെ ഈ വിവാദ പരാമർശം. "ചരിത്രം മറന്നോയെന്നും, നമ്മുടെ മുന്നിൽ പുരാവസ്തുപരമായ തെളിവ് ഉണ്ടാകുമ്പോൾ എങ്ങനെ കണ്ണടക്കുമെന്നും" ചന്ദ്രചൂഡ് അഭിമുഖത്തിൽ ചോദിക്കുന്നു.

അയോധ്യ വിധി വിശ്വാസത്തിന്റെ അടിസ്ഥാനത്തിലായിരുന്നില്ല, മറിച്ച് തെളിവുകളുടെ അടിസ്ഥാനത്തിലായിരുന്നുവെന്നും ചന്ദ്രചൂഡ് വ്യക്തമാക്കി. ക്ഷേത്രം പൊളിച്ചാണ് മസ്ജിദ് നിർമ്മിച്ചത് എന്നതിന് തെളിവില്ല എന്നായിരുന്നു സുപ്രീംകോടതിയുടെ വിധി. ഈ വിധി പുറപ്പെടുവിച്ച അഞ്ചംഗ ഭരണഘടനാ ബെഞ്ചിലെ ഒരംഗമായിരുന്നു ജസ്റ്റിസ് ചന്ദ്രചൂഡ്. എന്നാൽ, ഇപ്പോൾ ക്ഷേത്രം പൊളിച്ചാണ് മസ്ജിദ് നിർമ്മിച്ചതെന്ന വാദവുമായി അദ്ദേഹം രംഗത്തെത്തിയത് ഈ മുൻ നിലപാടിൽ നിന്ന് വ്യത്യസ്തമാണ്.