തന്റെ ഭരണകൂടത്തിനെതിരെ നെഗറ്റീവ് വാർത്തകൾ നൽകുന്ന മാധ്യമങ്ങൾക്ക് നേരെ ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഇനിയും ഇത് തുടർന്നാൽ ചാനലുകളുടെ ലൈസൻസ് റദ്ദാക്കുമെന്ന് അദ്ദേഹം പറഞ്ഞു. കൊല്ലപ്പെട്ട വലതുപക്ഷ പ്രവർത്തകനായ ചാർളി കിർക്കിനെക്കുറിച്ച് അവതാരകൻ നടത്തിയ പരാമർശത്തെ തുടർന്ന്, വാൾട്ട് ഡിസ്‌നിയുടെ ഉടമസ്ഥതയിലുള്ള എബിസി ചാനൽ സംപ്രേക്ഷണം ചെയ്യുന്ന 'ജിമ്മി കിമ്മൽ ലൈവ്' എന്ന കോമഡി ഷോ താൽക്കാലികമായി നിർത്തിവെച്ചിരുന്നു. ഈ പ്രഖ്യാപനത്തിന് മണിക്കൂറുകൾക്ക് ശേഷമാണ് ഇപ്പോൾ മുഴുവൻ ചാനലുകൾക്കുമെതിരെ ഭീഷണി മുഴക്കികൊണ്ട് ട്രംപ് രംഗത്തെത്തിയിരിക്കുന്നത്.
ഷോ നിർത്തിവെച്ചത് യു.എസ്. പ്രസിഡന്റ് ഡൊണാൾഡ് ആഘോഷമാക്കുകയും ചെയ്തിരുന്നു. ബ്രിട്ടനിലേക്കുള്ള ഔദ്യോഗിക സന്ദർശനത്തിനിടെ ട്രംപ്, ജിമ്മി കിമ്മലിനെ കഴിവില്ലാത്തവനെന്ന് വിശേഷിപ്പിക്കുകയും, 'ഒരു മഹാനായ മനുഷ്യനെക്കുറിച്ച് മോശം കാര്യങ്ങൾ പറഞ്ഞതിന്' അദ്ദേഹത്തെ വിമർശിക്കുകയും ചെയ്തു.
അമേരിക്കയിൽ തിരിച്ചെത്തിയ ശേഷം, എയർഫോഴ്‌സ് വണ്ണിൽ വെച്ച് മാധ്യമങ്ങളോട് സംസാരിക്കുമ്പോൾ, തനിക്കെതിരെ മോശം പ്രചാരണങ്ങൾ നടക്കുന്നുണ്ടെന്നും ട്രംപ് തുറന്നടിച്ചു. ഇത്തരം മാധ്യമങ്ങളുടെ ലൈസൻസ് റദ്ദാക്കണമെന്നും, അത് ഫെഡറൽ കമ്മ്യൂണിക്കേഷൻസ് കമ്മീഷൻ ചെയർമാൻ ബ്രെൻഡൻ കാറിന്റെ തീരുമാനമായിരിക്കുമെന്നും അദ്ദേഹം കൂട്ടിച്ചേർത്തു.