വാഷിംഗ്ടൺ: അമേരിക്കൻ പ്രസിഡന്റ് ‍ഡൊണാൾഡ് ട്രംപിന്റെ ഇരട്ടത്തീരുവയാണ് ഇന്ത്യ–യുഎസ് വാണിജ്യ ബന്ധം വഷളാക്കാനിടയാക്കിയത്. റഷ്യയിൽ നിന്ന് എണ്ണ ഇറക്കുമതി ചെയ്യുന്നുവെന്ന കാരണത്താലാണ് ഇന്ത്യയ്ക്കുമേൽ അമേരിക്ക 50 ശതമാനം തീരുവ ചുമത്തിയത്. ഇപ്പോഴിതാ അമേരിക്കൻ ചോളം ഇറക്കുമതി ചെയ്യുന്നില്ലെന്ന് ആരോപിച്ച് ഇന്ത്യക്കെതിരെ വീണ്ടും ട്രംപ് ഭരണകൂടം രംഗത്തെത്തിയിരിക്കുകയാണ്. പുതിയ വ്യാപാര ചർച്ചകൾക്ക് മുന്നോടിയായാണ് ഈ പുകച്ചിൽ.

യു.എസ്. വാണിജ്യ സെക്രട്ടറി ഹൊവാർഡ് ലുട്നിക്കാണ് ഇന്ത്യയെ വിമർശിച്ച് രംഗത്തെത്തിയത്. 140 കോടി ജനങ്ങളുണ്ടെന്ന് പറയുന്ന ഇന്ത്യ, കുറഞ്ഞ അളവിൽ പോലും അമേരിക്കൻ ചോളം വാങ്ങാൻ തയ്യാറാകുന്നില്ലെന്ന് ലുട്നിക്ക് കുറ്റപ്പെടുത്തി. അമേരിക്കൻ ഉത്പന്നങ്ങൾക്കുള്ള ഇറക്കുമതി തീരുവ ഇന്ത്യ കുറച്ചില്ലെങ്കിൽ കടുത്ത നടപടികൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.

"ഇന്ത്യ നമുക്ക് സാധനങ്ങൾ വിൽക്കുകയും അതിന്റെ നേട്ടങ്ങൾ കൊയ്യുകയും ചെയ്യുന്നു. എന്നാൽ, നമ്മുടെ ഉത്പന്നങ്ങളെ അവരുടെ സമ്പദ്‌വ്യവസ്ഥയിലേക്ക് കടത്തിവിടുന്നില്ല. ഇന്ത്യ-യു.എസ്. വ്യാപാര ബന്ധം 'വൺവേ' ആണ്. നമ്മുടെ ചോളം പോലും അവർ വാങ്ങുന്നില്ല. ഇത് നിങ്ങളെ അസ്വസ്ഥപ്പെടുത്തുന്നില്ലേ?" ഒരു അഭിമുഖത്തിനിടെ ലുട്നിക്ക് ചോദിച്ചു.

നികുതി കുറയ്ക്കാൻ ട്രംപ് തന്നെ ഇന്ത്യയോട് ആവശ്യപ്പെട്ടിട്ടുണ്ടെന്നും "ഞങ്ങൾ നിങ്ങളെ പരിഗണിക്കുന്ന പോലെ നിങ്ങൾ ഞങ്ങളെയും പരിഗണിക്കൂ" എന്ന് പറഞ്ഞതായും ലുട്നിക്ക് വെളിപ്പെടുത്തി. ഇത് സ്വീകരിക്കുകയോ അല്ലെങ്കിൽ കടുത്ത നടപടികളെ നേരിടാൻ തയ്യാറാവുകയോ ചെയ്യണമെന്ന് അദ്ദേഹം പറഞ്ഞു.