ലണ്ടൻ: റഷ്യയിൽ നിന്നും എണ്ണ ഇറക്കുമതി ചെയ്യുന്ന ഇന്ത്യയ്ക്കും ചൈനയ്ക്കും കൂടുതൽ താരിഫ് ചുമത്താൻ ജി7 രാജ്യങ്ങളോട് ആവശ്യപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭരണകൂടം. റഷ്യയുടെ യുദ്ധനീക്കങ്ങൾക്ക് തടയിടുക എന്ന ലക്ഷ്യത്തോടെയാണ് ഈ നീക്കം. ബ്രിട്ടീഷ് ദിനപത്രമായ ഫിനാൻഷ്യൽ ടൈംസാണ് ഇത് സംബന്ധിച്ച വിവരങ്ങൾ റിപ്പോർട്ട് ചെയ്തത്.

പുതിയ നിർദ്ദേശം അനുസരിച്ച് താരിഫ് 50 ശതമാനം മുതൽ 100 ​​ശതമാനം വരെയായി ഉയർത്താൻ സാധ്യതയുണ്ട്. ഈ വിഷയത്തെക്കുറിച്ച് ചർച്ച ചെയ്യുന്നതിനായി ജി7 രാജ്യങ്ങളായ കാനഡ, ഫ്രാൻസ്, ജർമ്മനി, ഇറ്റലി, ജപ്പാൻ, യുണൈറ്റഡ് കിംഗ്ഡം, യുണൈറ്റഡ് സ്റ്റേറ്റ്സ് എന്നീ രാജ്യങ്ങളിലെ ധനമന്ത്രിമാർ ഇന്ന് വീഡിയോ കോൺഫറൻസ് നടത്തും.

"റഷ്യയിൽ നിന്ന് എണ്ണ വാങ്ങുന്നത് പുടിന്റെ യുദ്ധക്കൊതിക്ക് ധനസഹായം നൽകുകയും ഉക്രെയ്ൻ ജനതയുടെ ദുരിതം വർദ്ധിപ്പിക്കുകയും ചെയ്യുന്നു. ഈ യുദ്ധം അവസാനിപ്പിക്കാൻ യൂറോപ്യൻ യൂണിയൻ സഖ്യകക്ഷികൾ ഗൗരവത്തോടെ ശ്രമിക്കണം. റഷ്യൻ ആക്രമണം അവസാനിക്കുന്ന ദിവസം റദ്ദാക്കാവുന്ന തരത്തിലുള്ള താരിഫുകൾ ചുമത്താൻ അവർ ഞങ്ങളോടൊപ്പം ചേരണം," യുഎസ് ട്രഷറി വകുപ്പ് വക്താവ് ഫിനാൻഷ്യൽ ടൈംസിനോട് പറഞ്ഞു.

ജി7-ന്റെ നിലവിലെ പ്രസിഡന്റ് എന്ന നിലയിൽ കാനഡ, ഈ കൂടിക്കാഴ്ച സ്ഥിരീകരിച്ചിട്ടുണ്ട്. റഷ്യയുടെ യുദ്ധനീക്കങ്ങളെ ചെറുക്കാനുള്ള കൂടുതൽ നടപടികൾ ചർച്ച ചെയ്യുമെന്നും അവർ അറിയിച്ചു. റഷ്യൻ എണ്ണയുടെ ഏറ്റവും വലിയ ഉപഭോക്താക്കളായ ഇന്ത്യയുടെയും ചൈനയുടെയും മേൽ സാമ്പത്തിക സമ്മർദ്ദം ചെലുത്തുന്നത് മോസ്കോയുടെ സാമ്പത്തിക സ്ഥിതിയെ സാരമായി ബാധിക്കുമെന്നാണ് യുഎസ് ഭരണകൂടം വിലയിരുത്തുന്നത്. ഇത് റഷ്യയെ ചർച്ചകൾക്ക് പ്രേരിപ്പിക്കാൻ സഹായിക്കുമെന്നും അവർ കരുതുന്നു.