കൊച്ചി: തിരുവിതാംകൂർ ദേവസ്വം ബോർഡ് സംഘടിപ്പിക്കുന്ന ആഗോള അയ്യപ്പ സംഗമം നടത്താൻ കേരള ഹൈക്കോടതി അനുമതി നൽകി. സംഗമത്തിൽ ഇടപെടുന്നില്ലെന്ന് കോടതി വ്യക്തമാക്കി. അതേസമയം, പരിപാടിക്കിടെ പമ്പയുടെ വിശുദ്ധി സംരക്ഷിക്കണമെന്ന് കോടതി നിർദേശിച്ചു.

സംഗമത്തിന്റെ ഭാഗമായി പമ്പയിൽ സ്ഥിരമായ നിർമാണ പ്രവർത്തനങ്ങൾ നടത്തരുതെന്നും, സാമ്പത്തിക ഇടപാടുകളുടെ കണക്കുകൾ 45 ദിവസത്തിനുള്ളിൽ ശബരിമല സ്പെഷ്യൽ കമ്മിഷണർക്ക് സമർപ്പിക്കണമെന്നും ഹൈക്കോടതി ഇടക്കാല ഉത്തരവിലൂടെ നിർദേശം നൽകി.

നേരത്തെ, ഭക്തിയുടെയും വിനോദസഞ്ചാരത്തിന്റെയും പേരിൽ നടത്തുന്നത് രാഷ്ട്രീയവും വാണിജ്യപരവുമായ പരിപാടിയാണെന്ന് ചൂണ്ടിക്കാട്ടി ഹൈക്കോടതിയിൽ ഹർജികൾ സമർപ്പിക്കപ്പെട്ടിരുന്നു. ഇതിനെത്തുടർന്ന് സംഗമത്തിന്റെ ലക്ഷ്യം, സ്വഭാവം, ധനസമാഹരണം, പങ്കെടുക്കുന്നവരെ തിരഞ്ഞെടുക്കുന്നതിനുള്ള മാനദണ്ഡം എന്നിവയിൽ വ്യക്തത വരുത്താൻ ഹൈക്കോടതി സർക്കാരിനോടും ദേവസ്വം ബോർഡിനോടും ആവശ്യപ്പെട്ടിരുന്നു. ഇവർ നൽകിയ മറുപടി പരിശോധിച്ച ശേഷമാണ് കോടതി ഇപ്പോൾ പരിപാടിക്ക് അനുമതി നൽകിയത്.