വാഷിങ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അടുത്ത അനുയായിയും യാഥാസ്ഥിതിക യുവജന സംഘടനയായ ടേണിങ് പോയിന്റ് യുഎസ്എയുടെ സിഇഒയും സഹസ്ഥാപകനുമായ ചാർളി കിർക്ക് വെടിയേറ്റു മരിച്ചു. യൂട്ടാ വാലി സർവകലാശാലയിൽ നടന്ന ഒരു പരിപാടിക്കിടെയാണ് കഴുത്തിൽ വെടിയേറ്റത്.
ഡൊണാൾഡ് ട്രംപ് തന്നെയാണ് തന്റെ സാമൂഹിക മാധ്യമങ്ങളിലൂടെ മരണവാർത്ത പുറത്തുവിട്ടത്. കിർക്ക് ആക്രമിക്കപ്പെടുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. എന്നാൽ, വെടിയുതിർത്തയാളെ പിടികൂടാനായില്ലെന്നാണ് റിപ്പോർട്ടുകൾ.
"മഹാനായ ചാർളി കിർക്ക് കൊല്ലപ്പെട്ടിരിക്കുന്നു. അമേരിക്കയിലെ യുവാക്കളുടെ ഹൃദയത്തെ ചാർളിയെക്കാൾ നന്നായി മറ്റാർക്കും മനസ്സിലാക്കാൻ കഴിഞ്ഞിട്ടില്ലായിരുന്നു," ട്രംപ് ട്രൂത്ത് സോഷ്യലിൽ കുറിച്ചു.
ആരാണ് ചാർളി കിർക്ക്?
ഷിക്കാഗോയിൽ ഒരു ആർക്കിടെക്ടിന്റെ മകനായി ജനിച്ച ചാർളി കിർക്ക് കമ്മ്യൂണിറ്റി കോളേജിൽ വിദ്യാർത്ഥിയായിരിക്കെ പഠനം ഉപേക്ഷിച്ച് മുഴുവൻ സമയ രാഷ്ട്രീയത്തിലേക്ക് ഇറങ്ങുകയായിരുന്നു. 2012-ൽ, 18 വയസ്സുള്ളപ്പോഴാണ് വില്ല്യം മോണ്ട്ഗോമെറിയുമായി ചേർന്ന് ടേണിങ് പോയിന്റ് യുഎസ്എ എന്ന സംഘടനയ്ക്ക് രൂപം നൽകിയത്. ബരാക് ഒബാമ വീണ്ടും പ്രസിഡന്റായി തിരഞ്ഞെടുക്കപ്പെട്ട രാഷ്ട്രീയ സാഹചര്യങ്ങളിലാണ് ഈ സംഘടന ആരംഭിച്ചത്. കുടുംബമൂല്യങ്ങൾ, സ്വതന്ത്ര വിപണി, ക്രിസ്ത്യൻ നാഷണലിസം തുടങ്ങിയ ആശയങ്ങളാണ് ഈ സംഘടന പ്രധാനമായും പ്രചരിപ്പിക്കുന്നത്. നിലവിൽ അമേരിക്കയിലെ 850-ൽ അധികം കോളേജുകളിൽ ഇവർക്ക് ഘടകങ്ങളുണ്ട്.
കഴിഞ്ഞ വർഷം നടന്ന അമേരിക്കൻ പ്രസിഡന്റ് തിരഞ്ഞെടുപ്പിൽ റിപ്പബ്ലിക്കൻ സ്ഥാനാർത്ഥിയായി ട്രംപിനെ തിരഞ്ഞെടുക്കുന്നതിൽ കിർക്കിനും ടേണിങ് പോയിന്റ് യുഎസ്എയ്ക്കും നിർണായക പങ്കുണ്ടായിരുന്നു. പതിനായിരക്കണക്കിന് പുതിയ വോട്ടർമാരെ ചേർത്ത് അരിസോണ സംസ്ഥാനം ട്രംപിന് അനുകൂലമാക്കുന്നതിലും കിർക്ക് വലിയ പങ്ക് വഹിച്ചു. വൈസ് പ്രസിഡന്റ് ജെ.ഡി. വാൻസിനെ ട്രംപുമായി അടുപ്പിക്കുന്നതിലും ഇദ്ദേഹം ഒരു പ്രധാന കണ്ണിയായിരുന്നു.