ന്യൂഡൽഹി: ഇന്ത്യയും യുഎസും തമ്മിലുള്ള വ്യാപാര ചർച്ചകൾ എത്രയും പെട്ടെന്ന് പൂർത്തിയാക്കാൻ ശ്രമിക്കുന്നതായി പ്രധാനമന്ത്രി നരേന്ദ്ര മോദി. യുഎസ് പ്രസിഡന്റ് ഡൊണാൾഡ് ട്രംപിന്റെ 'വളരെ നല്ല സുഹൃത്ത്' എന്ന പരാമർശത്തിന് പിന്നാലെയാണ് മോദിയുടെ ഈ പ്രതികരണം. ഇന്ത്യയും യുഎസും അടുത്ത സുഹൃത്തുക്കളും സ്വാഭാവിക പങ്കാളികളുമാണെന്ന് മോദി അഭിപ്രായപ്പെട്ടു.

ട്രംപിന്റെ സോഷ്യൽ മീഡിയ പോസ്റ്റ് പങ്കുവെച്ചുകൊണ്ടാണ് മോദി ഇക്കാര്യം അറിയിച്ചത്. വ്യാപാര ചർച്ചകൾ ഇരുരാജ്യങ്ങളും തമ്മിലുള്ള ബന്ധത്തിന് പുതിയ സാധ്യതകൾ തുറക്കുമെന്ന് തനിക്ക് ഉറപ്പുണ്ടെന്നും അദ്ദേഹം പറഞ്ഞു.

“ഇന്ത്യയും യുഎസും അടുത്ത സുഹൃത്തുക്കളും സ്വാഭാവിക പങ്കാളികളുമാണ്,” പ്രധാനമന്ത്രി നരേന്ദ്ര മോദി പറഞ്ഞു. “ഞങ്ങളുടെ വ്യാപാര ചർച്ചകൾക്ക് ഇരുരാജ്യങ്ങളുടെയും പങ്കാളിത്തത്തിന് പുതിയ വാതിലുകൾ തുറക്കാനാകുമെന്ന് എനിക്ക് ഉറപ്പുണ്ട്. ഇത് എത്രയും വേഗം പൂർത്തിയാക്കാൻ ഞങ്ങളുടെ ടീമുകൾ പ്രവർത്തിക്കുന്നു,” അദ്ദേഹം കൂട്ടിച്ചേർത്തു. ട്രംപിനൊപ്പം ഇരു രാജ്യങ്ങൾക്കും ശോഭനമായ ഭാവി കെട്ടിപ്പടുക്കാൻ ആഗ്രഹിക്കുന്നുവെന്നും മോദി പറഞ്ഞു.

നേരത്തെ, ഇന്ത്യയുമായുള്ള വ്യാപാര തടസ്സങ്ങൾ പരിഹരിക്കാൻ ചർച്ചകൾ തുടരുന്നതിൽ സന്തോഷമുണ്ടെന്ന് ഡൊണാൾഡ് ട്രംപ് തന്റെ 'ട്രൂത്ത് സോഷ്യൽ' എന്ന സോഷ്യൽ മീഡിയ പ്ലാറ്റ്‌ഫോമിൽ കുറിച്ചിരുന്നു. “വരും ആഴ്ചകളിൽ എന്റെ വളരെ നല്ല സുഹൃത്തായ പ്രധാനമന്ത്രി മോദിയുമായി സംസാരിക്കാൻ ഞാൻ ആഗ്രഹിക്കുന്നു. നമ്മുടെ മഹത്തായ രാജ്യങ്ങൾക്ക് വിജയകരമായ ഒരു ഉടമ്പടിയിലെത്താൻ ഒരു പ്രയാസവുമുണ്ടായിരിക്കില്ലെന്ന് എനിക്ക് ഉറപ്പുണ്ട്!” ട്രംപ് എഴുതി.

ഇന്ത്യൻ ഉത്പന്നങ്ങൾക്ക് ട്രംപ് 50 ശതമാനം നികുതി ചുമത്തിയതിന് പിന്നാലെയാണ് ഇരുനേതാക്കളുടെയും ഈ പ്രതികരണമെന്നത് ശ്രദ്ധേയമാണ്. റഷ്യയിൽ നിന്ന് ക്രൂഡ് ഓയിൽ വാങ്ങുന്നതിന് 25 ശതമാനം അധിക നികുതിയും ട്രംപ് പ്രഖ്യാപിച്ചിരുന്നു.