തൃശ്ശൂർ നഗരത്തെ ആവേശത്തിലാക്കി പുലിക്കളി. ഒമ്പത് പുലിക്കളി സംഘങ്ങളാണ് അണിനിരന്നത്. വിവിധ വർണങ്ങളിലുള്ള ചായക്കൂട്ടുകളാൽ പുലി വേഷമിട്ട കലാകാരന്മാർ അരമണിക്കിലുക്കങ്ങളുമായി നഗരവീഥികളിൽ താളത്തിനൊത്ത് ചുവടുവെച്ച് കാണികളെ ആവേശം കൊള്ളിച്ചു. വലിയ പുലികളും ചെറിയ പുലികളും വലിയ വയറുള്ള പുലികളും കൈയ്യടികൾ ഏറ്റുവാങ്ങി പതുക്കെ ചുവടുവെച്ച് നീങ്ങി.
ചെണ്ടമേളം ഒരുപോലെയാണെങ്കിലും ഓരോ പുലിക്കളി സംഘത്തിന്റെയും ചുവടുകൾ വ്യത്യസ്തമാണ്. ഈ ചുവടുകളുടെ അടിസ്ഥാനത്തിലാണ് വിജയികളെ തീരുമാനിക്കുന്നത്. നിലവിലെ ചാമ്പ്യന്മാരായ വിയ്യൂരും മറ്റ് സംഘങ്ങളും ഇത്തവണയും കപ്പ് നേടുമെന്ന ഉറപ്പോടെയാണ് കളത്തിലിറങ്ങിയത്. ഓരോ സംഘവും തങ്ങളുടെ ചുവടുകളിൽ അപ്രതീക്ഷിത ഇനങ്ങൾ ഒളിപ്പിച്ചുവെച്ചിട്ടുണ്ട്.
ഇത്തവണ തൃശ്ശൂരിന്റെ സ്വന്തം പുലിക്കളി ഉത്സവം കാണാൻ 11 രാജ്യങ്ങളിൽ നിന്നുള്ള സംഘമെത്തി. സർക്കാരിന്റെ അതിഥികളായെത്തിയ സംഘം കഴിഞ്ഞ ദിവസമാണ് തൃശ്ശൂരിലെത്തിയത്. കേരള ഉത്തരവാദിത്വ ടൂറിസം മിഷൻ സൊസൈറ്റിയുടെ നേതൃത്വത്തിൽ തൃശ്ശൂരിലെ ശ്രീജീവം ഉത്തരവാദിത്വ ടൂറിസം മിഷൻ ക്ലബ്ബിന്റെ സംഘാടനത്തിലാണ് വിദേശ ടൂറിസം പ്രതിനിധിസംഘം എത്തിച്ചേർന്നത്.
യുകെ, ഫ്രാൻസ്, ദക്ഷിണ കൊറിയ, ഇൻഡൊനീഷ്യ, തായ്‌ലൻഡ്, വിയറ്റ്‌നാം, തയ്‌വാൻ, നേപ്പാൾ, ശ്രീലങ്ക, റൊമാനിയ എന്നീ രാജ്യങ്ങളിൽ നിന്നും ഇന്ത്യയിലെ വിവിധ സംസ്ഥാനങ്ങളിൽ നിന്നുമുള്ള ഉത്തരവാദിത്വ ടൂറിസം നേതാക്കൾ, അക്കാദമീഷ്യന്മാർ, ടൂർ ഓപ്പറേറ്റർമാർ എന്നിവരാണ് സംഘത്തിലുള്ളത്. ഇവർ പുലിക്കളിയുടെ മെയ്യെഴുത്ത്, ചുവട്, താളം എന്നിവ നേരിട്ടറിയുകയും പുലികളുമായി സംവദിക്കുകയും ചെയ്യും. സീതാറാം മിൽ ലെയ്ൻ ദേശമുൾപ്പെടെ ഇവർ സന്ദർശിക്കും.