ജറുസലേം: കിഴക്കൻ ജറുസലേമിലെ തിരക്കേറിയ ബസ് സ്റ്റോപ്പിൽ തിങ്കളാഴ്ചയുണ്ടായ വെടിവെപ്പിൽ ആറ് പേർ കൊല്ലപ്പെടുകയും 12 പേർക്ക് പരിക്കേൽക്കുകയും ചെയ്തതായി ഇസ്രായേൽ പോലീസ്, എമർജൻസി റെസ്ക്യൂ സർവീസുകൾ, ആശുപത്രികൾ എന്നിവ അറിയിച്ചു. ആക്രമികൾ ബസ് സ്റ്റോപ്പിൽ കാത്തുനിന്ന ആളുകൾക്ക് നേരെയാണ് വെടിയുതിർത്തതെന്ന് പോലീസ് പറഞ്ഞു. തിങ്കളാഴ്ചത്തെ വെടിവെപ്പ് ജറുസലേമിന്റെ വടക്കൻ പ്രവേശന കവാടത്തിലുള്ള ഒരു പ്രധാന കവലയിൽ വെച്ചാണ് നടന്നത്.

കിഴക്കൻ ജറുസലേമിലെ ജൂത കുടിയേറ്റ കേന്ദ്രങ്ങളിലേക്ക് പോകുന്ന റോഡാണിത്. ആക്രമണത്തിന്റെ ദൃശ്യങ്ങളിൽ, രാവിലെ തിരക്കേറിയ സമയത്ത് ബസ് സ്റ്റോപ്പിൽ നിന്ന് ആളുകൾ ചിതറി ഓടുന്നതായി കാണാം. അതേസമയം സ്ഥലത്തുണ്ടായിരുന്ന ഒരു ഇസ്രായേൽ സൈനികനും ഒരു സാധാരണക്കാരനും ചേർന്ന് അക്രമികളെ വെടിവെച്ച് കൊലപ്പെടുത്തിയതായി പോലീസ് അറിയിച്ചു.

ഗാസയിലെ യുദ്ധം ഇസ്രായേൽ അധിനിവേശ വെസ്റ്റ് ബാങ്കിലും ഇസ്രായേലിലും അക്രമസംഭവങ്ങൾ വർധിക്കുന്നതിന് കാരണമായിട്ടുണ്ട്. പലസ്തീൻ പോരാളികൾ ഇസ്രായേലിനും വെസ്റ്റ് ബാങ്കിലുമുള്ള ഇസ്രായേലികൾക്ക് നേരെ ആക്രമണം നടത്താറുണ്ട്. അതേസമയം, പലസ്തീനികൾക്കെതിരെ ഇസ്രായേലി കുടിയേറ്റക്കാരുടെ ആക്രമണങ്ങളും വർധിച്ചിട്ടുണ്ട്.

ബുള്ളറ്റുകൾ തുളച്ചുകയറിയ ഒരു ബസ് ബസ് സ്റ്റോപ്പിൽ കിടക്കുന്നുണ്ട്. സാധനങ്ങൾ റോഡിൽ ചിതറിക്കിടക്കുന്നതായും കാണാം. സംഭവ സ്ഥലത്തെത്തിയ പാരാമെഡിക്കുകൾ പറയുന്നത്, ആ പ്രദേശം മുഴുവൻ കുത്തഴിഞ്ഞ നിലയിലായിരുന്നുവെന്നാണ്. തകർന്ന ഗ്ലാസ്സുകളും വെടിവെപ്പിൽ പരിക്കേറ്റ് റോഡിലും ഫുട്പാത്തിലും വീണുകിടക്കുന്ന ആളുകളും ഉണ്ടായിരുന്നു.

സംഭവം നടന്ന് ഏകദേശം രണ്ട് മണിക്കൂറിന് ശേഷം പ്രധാനമന്ത്രി ബെഞ്ചമിൻ നെതന്യാഹു സ്ഥലത്തെത്തി. തന്റെ അഴിമതിക്കേസുമായി ബന്ധപ്പെട്ട് കോടതിയിൽ ഹാജരാകേണ്ടിയിരുന്ന നെതന്യാഹു സുരക്ഷാ സാഹചര്യം കണക്കിലെടുത്ത് അത് മാറ്റിവെക്കുകയായിരുന്നു. "ഗാസ, വെസ്റ്റ് ബാങ്ക്, ഇസ്രായേൽ എന്നിവയുൾപ്പെടെ നിരവധി മേഖലകളിൽ ഇസ്രായേൽ യുദ്ധം ചെയ്യുകയാണെന്ന്" അദ്ദേഹം പറഞ്ഞു. അക്രമിയെ വധിച്ച സൈനികനെ നെതന്യാഹു അഭിനന്ദിച്ചു.

സംഭവം നടന്ന സ്ഥലത്ത് കൂടുതൽ ആക്രമികൾ ഉണ്ടോയെന്നും, ബോംബുകൾ സ്ഥാപിച്ചിട്ടുണ്ടോയെന്നും കണ്ടെത്താനായി നൂറുകണക്കിന് സുരക്ഷാ സേനാംഗങ്ങൾ എത്തി പരിശോധന നടത്തി. ആക്രമണത്തിന് പിന്നാലെ സമീപത്തുള്ള വെസ്റ്റ് ബാങ്ക് നഗരമായ റാമല്ലയുടെ പ്രാന്തപ്രദേശത്തുള്ള പലസ്തീൻ ഗ്രാമങ്ങൾ വളഞ്ഞതായി ഇസ്രായേൽ സൈന്യം അറിയിച്ചു.

ആക്രമണത്തിന്റെ ഉത്തരവാദിത്തം ഏറ്റെടുക്കാതെ തന്നെ ഹമാസ് ഇതിനെ "നമ്മുടെ ജനങ്ങൾക്കെതിരെയുള്ള അധിനിവേശത്തിന്റെ കുറ്റകൃത്യങ്ങൾക്ക് സ്വാഭാവികമായ പ്രതികരണം" എന്ന് വിശേഷിപ്പിച്ചു.

2024 ഒക്ടോബറിൽ തെൽ അവീവിൽ ഒരു ലൈറ്റ് റെയിൽ ട്രെയിനിനുള്ളിൽ രണ്ട് പലസ്തീനികൾ നടത്തിയ വെടിവെപ്പിന് ശേഷം നടക്കുന്ന ഏറ്റവും മാരകമായ ആക്രമണമാണിത്. ആ ആക്രമണത്തിൽ ഏഴ് പേർ കൊല്ലപ്പെട്ടിരുന്നു. ഹമാസിന്റെ സൈനിക വിഭാഗം ആ ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു.

യുഎൻ മാനുഷിക കാര്യ ഓഫീസ് നൽകിയ കണക്കുകൾ അനുസരിച്ച്, യുദ്ധം ആരംഭിച്ച ശേഷം 2025 ജൂലൈ വരെ ഇസ്രായേലിലോ വെസ്റ്റ് ബാങ്കിലോ പലസ്തീനികൾ നടത്തിയ ആക്രമണങ്ങളിൽ 49 ഇസ്രായേലികൾ കൊല്ലപ്പെട്ടിട്ടുണ്ട്. ഇതേ കാലയളവിൽ, ഇസ്രായേൽ സേനയും സാധാരണക്കാരും ചേർന്ന് ഇസ്രായേലിലും വെസ്റ്റ് ബാങ്കിലുമായി കുറഞ്ഞത് 968 പലസ്തീനികളെ കൊലപ്പെടുത്തി.