അമേരിക്കയിലെ കലിഫോർണിയയിൽ പൊതുസ്ഥലത്ത് മൂത്രമൊഴിക്കുന്നത് ചോദ്യം ചെയ്തതിനെ തുടർന്ന് ഇന്ത്യക്കാരനായ യുവാവിനെ വെടിവെച്ചു കൊന്നു. ഹരിയാനയിലെ ജിന്ദ് ജില്ലയിൽ നിന്നുള്ള 26 വയസ്സുകാരനായ കപിൽ ആണ് കൊല്ലപ്പെട്ടത്. ശനിയാഴ്ച വൈകുന്നേരം ജോലി സ്ഥലത്തിന് സമീപം വെച്ചാണ് സംഭവം.
കലിഫോർണിയയിലെ ഒരു കടയിൽ സുരക്ഷാ ഉദ്യോഗസ്ഥനായി ജോലി ചെയ്യുകയായിരുന്നു കപിൽ. ഡ്യൂട്ടി സമയത്ത് കടയ്ക്ക് സമീപം ഒരു അമേരിക്കൻ പൗരൻ മൂത്രമൊഴിക്കുന്നത് കണ്ടപ്പോൾ, അത് ചോദ്യം ചെയ്യുകയും ഇതിൽ പ്രകോപിതനായ അയാൾ പിസ്റ്റൾ ഉപയോഗിച്ച് കപിലിനെ വെടിവെക്കുകയുമായിരുന്നുവെന്ന് കുടുംബം പറയുന്നു. ഉടൻ തന്നെ കപിലിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അതേസമയം അമേരിക്കയിൽ അവധിയായതിനാൽ പോസ്റ്റ്‌മോർട്ടം നടപടികൾ ബുധനാഴ്ച മാത്രമേ നടക്കൂ. മൃതദേഹം നാട്ടിലെത്തിക്കാൻ ഏകദേശം 15 ലക്ഷം രൂപ ചെലവ് വരുമെന്നാണ് കുടുംബം പറയുന്നത്. 2022-ൽ 45 ലക്ഷം രൂപ നൽകി ഒരു ഏജന്റ് വഴിയാണ് കപിൽ യു.എസ്സിലെത്തിയത്. പിന്നീട് അറസ്റ്റിലായെങ്കിലും നിയമനടപടികളിലൂടെ മോചിതനായി രാജ്യത്ത് സ്ഥിരതാമസമാക്കുകയായിരുന്നു. ഹരിയാനയിലെ ഒരു സാധാരണ കർഷക കുടുംബത്തിലെ ഏക മകനാണ് കപിൽ. മാതാപിതാക്കളും രണ്ട് സഹോദരിമാരുമടങ്ങുന്നതാണ് കുടുംബം. യു.എസ്സിൽ താമസിക്കുന്ന ഒരു ബന്ധുവാണ് മരണവിവരം കുടുംബത്തെ അറിയിച്ചത്.
അതിനിടെ യു.എസ്സിൽ ഗത്ക അഭ്യാസം നടത്തിയ സിഖുകാരനെ പോലീസ് വെടിവെച്ചുകൊന്നു. കഴിഞ്ഞ ഓഗസ്റ്റ് അവസാനമാണ് സംഭവം. ലോസ് ഏഞ്ചൽസ് നഗരത്തിൽ നടുറോഡിൽ ആയുധവുമായി ഗത്ക അഭ്യാസം നടത്തിയ സിഖുകാരനെ യു.എസ്. പോലീസ് വെടിവെച്ചു കൊന്നിരുന്നു. ലോസ് ഏഞ്ചൽസിലെ ക്രിപ്‌റ്റോ.കോം അരീനയ്ക്ക് സമീപം ആയുധവുമായി റോഡിലൂടെ ഓടി ഭീകരാന്തരീക്ഷം സൃഷ്ടിച്ച ഇയാളോട് പോലീസ് പിന്തിരിയാൻ ആവശ്യപ്പെട്ടെങ്കിലും അനുസരിക്കാൻ തയ്യാറായില്ല. ഇതോടെയാണ് പോലീസ് ഇയാൾക്ക് നേരെ വെടിയുതിർത്തത്.