നിലപാടുകളിൽ ഉറയ്ക്കാതെ ട്രംപ്. മോദി മഹാനായ നേതാവെന്നും ഇന്ത്യയുമായി നല്ല ബന്ധമെന്നും പറഞ്ഞു. അതേസമയം റഷ്യയിൽ നിന്ന് ഇന്ത്യ എണ്ണ ഇറക്കുമതി ചെയ്യുന്നതിലുള്ള അതൃപ്തി വ്യക്തമാക്കി യുഎസ് പ്രസിഡന്റ് ഡൊണാൾഡ് ട്രംപ്. ഉക്രെയ്ൻ യുദ്ധവുമായി ബന്ധപ്പെട്ട ആഗോള പ്രതിസന്ധികൾക്കിടയിലും ഇന്ത്യ റഷ്യയിൽ നിന്ന് വലിയ അളവിൽ എണ്ണ വാങ്ങുന്നത് തന്നെ നിരാശനാക്കിയെന്ന് ട്രംപ് പറഞ്ഞു.

റഷ്യയുമായുള്ള ഇന്ത്യയുടെ വ്യാപാരത്തെ വിമർശിച്ച ട്രംപ്, "ഇന്ത്യ റഷ്യയിൽ നിന്ന് ധാരാളം എണ്ണ വാങ്ങുന്നത് എന്നെ നിരാശനാക്കി. അത് നിലവിലെ സാഹചര്യത്തിന് സഹായകമല്ല," എന്ന് അഭിപ്രായപ്പെട്ടു. പാശ്ചാത്യ രാജ്യങ്ങൾ റഷ്യക്ക് ഉപരോധം ഏർപ്പെടുത്തിയ പശ്ചാത്തലത്തിൽ, മറ്റ് രാജ്യങ്ങൾ റഷ്യയുമായി തുടർന്നും വ്യാപാരബന്ധം പുലർത്തുന്നത് സൃഷ്ടിക്കുന്ന ഭൗമരാഷ്ട്രീയ പ്രത്യാഘാതങ്ങളെക്കുറിച്ചാണ് അദ്ദേഹം സംസാരിച്ചത്.

എന്നാൽ, നയപരമായ വിഷയങ്ങളിൽ വിമർശനം ഉന്നയിച്ചപ്പോഴും പ്രധാനമന്ത്രി നരേന്ദ്ര മോദിയുമായുള്ള വ്യക്തിപരമായ ബന്ധത്തെക്കുറിച്ച് ട്രംപ് എടുത്ത് പറഞ്ഞു. "നിങ്ങൾക്കറിയാവുന്നതുപോലെ മോദിയുമായി എനിക്ക് നല്ല ബന്ധമുണ്ട്. അദ്ദേഹം മികച്ച നേതാവാണ്," ട്രംപ് കൂട്ടിച്ചേർത്തു.

കൂടാതെ, ഏതാനും മാസങ്ങൾക്ക് മുൻപ് മോദി നടത്തിയ യുഎസ് സന്ദർശനത്തെക്കുറിച്ചും ട്രംപ് ഓർത്തെടുത്തു. "രണ്ട് മാസം മുൻപാണ് അദ്ദേഹം ഇവിടെ വന്നത്. ഞങ്ങൾക്ക് മികച്ച സമയം ലഭിച്ചു," ട്രംപ് പറഞ്ഞു.

റഷ്യയിൽ നിന്നുള്ള എണ്ണ വാങ്ങലുമായി ബന്ധപ്പെട്ട് ട്രംപ് ഭരണകൂടം ഇന്ത്യൻ ഉത്പന്നങ്ങൾക്ക് 50% അധിക താരിഫ് ചുമത്തിയതും, മോദി ചൈനീസ് പ്രസിഡന്റ് ഷി ജിൻപിങ്, റഷ്യൻ പ്രസിഡന്റ് വ്‌ളാഡിമിർ പുടിൻ എന്നിവരുമായി കൂടിക്കാഴ്ച നടത്തിയതും പരിഗണിക്കുമ്പോൾ ട്രംപിന്റെ ഈ പ്രസ്താവന നിർണ്ണായകമാണ്.

ഇതിന് പുറമെ, വൈറ്റ് ഹൗസിലെ റോസ് ഗാർഡനിൽ വെച്ച് നടത്തിയ വാർത്താസമ്മേളനത്തെക്കുറിച്ചും ട്രംപ് ഓർത്തെടുത്തു. "ഞങ്ങൾ റോസ് ഗാർഡനിലേക്ക് പോയി, പുല്ല് നനഞ്ഞ് കുതിർന്നിരുന്നു. ഒരു വാർത്താസമ്മേളനത്തിന് പറ്റിയ ഒട്ടും നല്ല സ്ഥലമായിരുന്നില്ല അത്. ഞാൻ പറഞ്ഞു, വൈറ്റ് ഹൗസിന്റെ പ്രതീകമായ മനോഹരമായ വെളുത്ത കല്ലുകൾ നമുക്ക് ഉപയോഗിക്കാം. അതിന് വലിയ സ്വീകാര്യത ലഭിച്ചു," ട്രംപ് പറഞ്ഞു.

ഇന്ത്യയും യുഎസും തമ്മിലുള്ള വ്യാപാര ചർച്ചകളിൽ അനിശ്ചിതത്വം നിലനിൽക്കുന്ന സാഹചര്യത്തിലാണ് ട്രംപിന്റെ ഈ പ്രതികരണം. ആറാമത് വട്ട ചർച്ചകൾ അടുത്തിടെ റദ്ദാക്കിയിരുന്നു. ഇതുവരെ അഞ്ച് തവണ ചർച്ചകൾ നടന്നിട്ടുണ്ട്. കാർഷിക, മൃഗസംരക്ഷണ മേഖലകളിലേക്കുള്ള പ്രവേശനം പ്രധാന തർക്കവിഷയങ്ങളിലൊന്നാണ്.