കോട്ടയം: പകൽ ഓണാഘോഷ പരിപാടിയിൽ സജീവമായി പങ്കെടുത്ത ശേഷം വീട്ടിലെത്തിയ പൊലീസ് ഉദ്യോ​ഗസ്ഥൻ രാത്രി വീട്ടിലെത്തി കുഴഞ്ഞുവീണ് മരിച്ചു. കോട്ടയം ഈസ്റ്റ് പോലീസ് സ്റ്റേഷനിലെ സിവിൽ പോലീസ് ഓഫീസറായ സതീഷ് ചന്ദ്രൻ (42) ആണ് മരിച്ചത്.

പോലീസ് സ്റ്റേഷനിലെ ഓണാഘോഷത്തിൽ അദ്ദേഹം പാട്ടുപാടുകയും സജീവമായി പങ്കെടുക്കുകയും ചെയ്തിരുന്നു. രാത്രി പത്തു മണിയോടെ വീട്ടിൽ വെച്ച് അദ്ദേഹത്തിന് നെഞ്ചുവേദന അനുഭവപ്പെടുകയും തുടർന്ന് ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

പോലീസ് സ്റ്റേഷനിലെ ഓണാഘോഷ പരിപാടിയിൽ സതീഷ് പാട്ടുപാടുന്ന വീഡിയോ സാമൂഹ്യ മാധ്യമങ്ങളിൽ പ്രചരിക്കുന്നുണ്ട്. അദ്ദേഹത്തിന്റെ അപ്രതീക്ഷിത മരണം സഹപ്രവർത്തകരെയും സുഹൃത്തുക്കളെയും ദുഃഖത്തിലാഴ്ത്തി. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം പൊതുദർശനത്തിനായി പോലീസ് സ്റ്റേഷനിൽ വെച്ചു.