ഡൽഹി: അവിഹിത ബന്ധം സംശയിച്ച് ഭാര്യ വിവാഹമോചനത്തിന് ഹർജി നൽകിയാൽ ഭർത്താവിൻ്റെയും അയാളുടെ കാമുകിയുടെയും കോൾ ഡാറ്റാ റെക്കോർഡുകളും (സിഡിആർ) ലൊക്കേഷൻ വിവരങ്ങളും തേടാമെന്ന് ഡൽഹി ഹൈക്കോടതി. ഈ രേഖകൾ കേസിലെ സത്യാവസ്ഥ കണ്ടെത്താൻ സഹായിക്കുന്ന വസ്തുനിഷ്ഠമായ തെളിവുകളാണെന്ന് കോടതി വ്യക്തമാക്കി.

ഭാര്യയുടെ ആവശ്യങ്ങൾ അനുവദിച്ചുകൊണ്ട് കുടുംബകോടതി പുറപ്പെടുവിച്ച ഉത്തരവിനെതിരെ ഭർത്താവും കാമുകിയും നൽകിയ ഹർജി പരിഗണിച്ചാണ് ജസ്റ്റിസുമാരായ അനിൽ ക്ഷേത്രപാൽ, ഹരീഷ് വൈദ്യനാഥൻ ശങ്കർ എന്നിവരടങ്ങിയ ബെഞ്ചിൻ്റെ ഈ സുപ്രധാന വിധി.

2002 ഒക്ടോബറിൽ വിവാഹിതരായ ദമ്പതികൾക്ക് രണ്ട് കുട്ടികളുണ്ട്. എന്നാൽ, 2023-ൽ ഭർത്താവിന് മറ്റൊരു സ്ത്രീയുമായി അവിഹിത ബന്ധമുണ്ടെന്ന് ആരോപിച്ച് ഭാര്യ വിവാഹമോചനത്തിന് ഹർജി നൽകി. തൻ്റെ ഭർത്താവും കാമുകിയും പലപ്പോഴും ഒരുമിച്ച് യാത്ര ചെയ്തിട്ടുണ്ടെന്നും അവർക്ക് അവിഹിത ബന്ധമുണ്ടെന്നും സ്ഥാപിക്കാൻ ഈ രേഖകൾ ആവശ്യമാണെന്ന് ഭാര്യ വാദിച്ചു. തുടർന്ന് ജനുവരി 2020 മുതലുള്ള സിഡിആറും ലൊക്കേഷൻ വിവരങ്ങളും സംരക്ഷിക്കാൻ കുടുംബകോടതി ഉത്തരവിട്ടിരുന്നു.

ഈ ഉത്തരവിനെ ചോദ്യം ചെയ്ത് കാമുകി ഹൈക്കോടതിയെ സമീപിച്ചു. കുടുംബകോടതിയുടെ തീരുമാനം നിയമവിരുദ്ധമാണെന്നും അത് സ്വകാര്യതയ്ക്കുള്ള മൗലികാവകാശത്തിൻ്റെ ലംഘനമാണെന്നും അവർ വാദിച്ചു. കൂടാതെ, തന്നെ ഉപദ്രവിക്കാനും അപകീർത്തിപ്പെടുത്താനും വേണ്ടിയാണ് ഭാര്യ ഈ വിവരങ്ങൾ തേടുന്നതെന്നും അവർ ആരോപിച്ചു. അതേസമയം, വെറും ടെലിഫോൺ സംഭാഷണങ്ങളോ ടവർ ലൊക്കേഷനുകളോ അവിഹിതബന്ധത്തിന് തെളിവാകില്ലെന്ന് ഭർത്താവും വാദിച്ചു.

എന്നാൽ, സത്യം കണ്ടെത്താനും നീതി ഉറപ്പാക്കാനും ആവശ്യമെങ്കിൽ വ്യക്തിപരമായ സ്വകാര്യതയിൽ പരിമിതമായ ഇടപെടലുകൾ അനുവദിക്കാമെന്ന് 2003-ൽ സുപ്രീം കോടതി പുറപ്പെടുവിച്ച 'ഷാർദ vs ധരംപാൽ' കേസിലെ വിധി ഡൽഹി ഹൈക്കോടതി ഉദ്ധരിച്ചു. ആശയവിനിമയത്തിൻ്റെ ഉള്ളടക്കത്തിൽ കടന്നുകയറാതെതന്നെ, ടെലികോം ഓപ്പറേറ്റർമാർ സൂക്ഷിക്കുന്ന ഇത്തരം വിവരങ്ങൾ വസ്തുനിഷ്ഠമായ സാഹചര്യ തെളിവുകൾ നൽകുമെന്ന് കോടതി നിരീക്ഷിച്ചു. അതുകൊണ്ട്, കുടുംബകോടതിയുടെ ഉത്തരവ് ശരിയാണെന്നും ഹൈക്കോടതി വ്യക്തമാക്കി.