ഡോളറിനെതിരെ ഇന്ത്യൻ രൂപയുടെ മൂല്യം ചരിത്രത്തിലെ ഏറ്റവും വലിയ തകർച്ച നേരിട്ടു. 87.69 എന്ന നിരക്കിൽ വ്യാപാരം ആരംഭിച്ച രൂപ, പെട്ടെന്ന് തന്നെ 88.29 എന്ന റെക്കോർഡ് താഴ്ചയിലേക്ക് കൂപ്പുകുത്തി. ഡോളറിനെതിരെ രൂപയുടെ മൂല്യം 88-ൽ താഴെ എത്തുന്നത് ഇത് ആദ്യമായാണ്.

ട്രംപ് ഭരണകൂടം ഇന്ത്യയ്ക്കെതിരെ പ്രഖ്യാപിച്ച 50% ഇറക്കുമതി തീരുവയാണ് ഈ തകർച്ചയ്ക്ക് പ്രധാന കാരണം. ഇത് ഇന്ത്യയുടെ കയറ്റുമതിയെ ഗുരുതരമായി ബാധിക്കുമെന്ന ആശങ്കകൾ വിപണിയിൽ വർദ്ധിച്ചു. വിദേശ നിക്ഷേപകർ ഓഹരി വിപണിയിൽ നിന്ന് പണം പിൻവലിച്ചതും എണ്ണ ഇറക്കുമതിക്കാർ ഡോളറിനായി വൻതോതിൽ ഡിമാൻഡ് ഉയർത്തിയതും രൂപയുടെ തകർച്ചയ്ക്ക് ആക്കം കൂട്ടി.

രൂപയുടെ മൂല്യം ഇടിയുന്നത് തടയാനായി റിസർവ് ബാങ്ക് ശക്തമായി ഇടപെട്ടു. വിദേശ നാണയ ശേഖരത്തിൽ നിന്ന് വൻതോതിൽ ഡോളർ വിറ്റഴിച്ചുകൊണ്ട് രൂപയെ പിടിച്ചുനിർത്താൻ ശ്രമിച്ചു. ഈ ഇടപെടൽ മൂലം രൂപ 88.12 എന്ന നിലയിലേക്ക് തിരികെ എത്തി. റിസർവ് ബാങ്ക് ഇടപെട്ടിരുന്നില്ലെങ്കിൽ രൂപ കൂടുതൽ ദുർബലമാകുമായിരുന്നു

രൂപയുടെ ഈ തളർച്ച ഇന്ത്യയുടെ സാമ്പത്തിക രംഗത്തിന് ഗുണങ്ങളും ദോഷങ്ങളുമുണ്ട്. കയറ്റുമതിക്കാർക്ക് സാധാരണയായി രൂപയുടെ മൂല്യം കുറയുന്നത് നേട്ടമാണ്, എന്നാൽ ട്രംപിന്റെ പുതിയ ഇറക്കുമതി തീരുവ കാരണം ഈ മേഖല സമ്മർദ്ദത്തിലാണ്

പ്രധാന പ്രത്യാഘാതങ്ങൾ:

ഇറക്കുമതി: ക്രൂഡ് ഓയിൽ, സ്വർണ്ണം, ഇലക്ട്രോണിക്സ്, മറ്റ് അസംസ്കൃത വസ്തുക്കൾ എന്നിവ ഇറക്കുമതി ചെയ്യാൻ കൂടുതൽ പണം ചെലവാകും. ഇത് രാജ്യത്ത് ഈ ഉത്പന്നങ്ങളുടെ വില വർദ്ധിപ്പിക്കും.

പണപ്പെരുപ്പം: ഇറക്കുമതി ഉത്പന്നങ്ങൾക്ക് വില കൂടുന്നത് അവശ്യവസ്തുക്കളുടെ വിലവർദ്ധനവിനും പണപ്പെരുപ്പത്തിനും കാരണമാകും.

വിദ്യാഭ്യാസം, യാത്ര: വിദേശത്ത് പഠിക്കുന്ന വിദ്യാർത്ഥികൾക്കും വിദേശയാത്ര ചെയ്യുന്നവർക്കും പഠനത്തിനും യാത്രയ്ക്കുമായി കൂടുതൽ പണം കണ്ടെത്തേണ്ടി വരും.

പ്രവാസികൾക്ക് സന്തോഷവാർത്ത:

രൂപയുടെ തകർച്ച പ്രവാസികൾക്ക് വലിയ നേട്ടമാണ്. അവർക്ക് നാട്ടിലേക്ക് കൂടുതൽ പണം അയയ്ക്കാൻ കഴിയും. ഉദാഹരണത്തിന്, ഏതാനും മാസങ്ങൾക്ക് മുൻപ് ഒരു ഡോളറിന് 85 രൂപ ലഭിച്ചിരുന്നപ്പോൾ ഇപ്പോൾ 88 രൂപയ്ക്ക് മുകളിലായി. ജിസിസി കറൻസികളായ യുഎഇ ദിർഹം, സൗദി റിയാൽ, ഖത്തർ റിയാൽ എന്നിവയ്ക്കും രൂപയ്ക്കെതിരെ മൂല്യം വർദ്ധിച്ചു.