വാഷിങ്ടൺ: യുഎസ് മുൻ വൈസ് പ്രസിഡന്റ് കമല ഹാരിസിന് ജോ ബൈഡൻ സർക്കാർ ഏർപ്പെടുത്തിയിരുന്ന അധിക സുരക്ഷ പ്രസിഡന്റ് ഡൊണാൾഡ് ട്രംപ് റദ്ദാക്കി. സെപ്റ്റംബർ 1 മുതൽ ഈ സുരക്ഷാ നടപടികൾ നിർത്തലാക്കാൻ ട്രംപ് സീക്രട്ട് സർവീസിന് നിർദ്ദേശം നൽകി.

നേരത്തെ, പദവി ഒഴിഞ്ഞതിന് ശേഷം ആറുമാസത്തേക്ക് കമല ഹാരിസിന് സീക്രട്ട് സർവീസ് സുരക്ഷ ലഭിക്കാൻ നിയമപ്രകാരം അർഹതയുണ്ടായിരുന്നു. ഇത് ജൂലായിൽ അവസാനിക്കേണ്ടതായിരുന്നു. എന്നാൽ, ജോ ബൈഡൻ ഒപ്പിട്ട ഒരു നിർദ്ദേശപ്രകാരം ഈ സുരക്ഷ ഒരു വർഷത്തേക്ക് കൂടി രഹസ്യമായി നീട്ടിയിരുന്നു. വ്യാഴാഴ്ച പുറത്തിറക്കിയ മെമ്മോയിലൂടെയാണ് ട്രംപ് ഇത് റദ്ദാക്കിയത്.

ബിബിസി റിപ്പോർട്ട് അനുസരിച്ച്, ഓഗസ്റ്റ് 28-ന് പുറത്തിറക്കിയ മെമ്മോയിൽ നിയമം അനുശാസിക്കുന്ന ആറ് മാസത്തിനപ്പുറം കമല ഹാരിസിന് നൽകിയിരുന്ന എല്ലാ സുരക്ഷാ നടപടികളും നിർത്തലാക്കാൻ സീക്രട്ട് സർവീസിനോട് ആവശ്യപ്പെട്ടിട്ടുണ്ട്.

ഈ നീക്കം ഒരു മുതിർന്ന വൈറ്റ് ഹൗസ് ഉദ്യോഗസ്ഥൻ സ്ഥിരീകരിച്ചിട്ടുണ്ട്. ഹാരിസിന്റെ സുരക്ഷ ആറ് മാസത്തിനപ്പുറം നീട്ടേണ്ടതിന് ആവശ്യമായ തരത്തിലുള്ള ഭീഷണികളൊന്നും കണ്ടെത്തിയിട്ടില്ലെന്ന് ബന്ധപ്പെട്ട വൃത്തങ്ങൾ അറിയിച്ചു. ട്രംപിന്റെ ഈ നടപടി രാഷ്ട്രീയമായി വലിയ വിവാദങ്ങൾക്ക് വഴിവെച്ചിരിക്കുകയാണ്.