വാണിജ്യനയങ്ങളുമായി ബന്ധപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപ് നാല് തവണ വിളിച്ചിട്ടും പ്രധാനമന്ത്രി നരേന്ദ്ര മോദി ഫോണെടുത്തില്ലെന്ന് റിപ്പോർട്ട്. ജർമ്മൻ പത്രമായ FAZ ആണ് റിപ്പോർട്ട് ചെയ്തത്. ഇതോടെ ഇരു രാജ്യങ്ങളും തമ്മിലുള്ള ബന്ധത്തിൽ കൂടുതൽ ഉലച്ചിലുണ്ടായി. ട്രംപിന്റെ ആക്രമണോത്സുകമായ വ്യാപാരനയങ്ങളിലും ഇന്ത്യയെ ‘നശിച്ച സമ്പദ്‌വ്യവസ്ഥ’ എന്ന് വിളിച്ചതിലുമുള്ള മോദിയുടെ അതൃപ്തിയാണ് ഇതിന് കാരണമെന്ന് പത്രം പറയുന്നു.

ഈ സാഹചര്യത്തിൽ, ഇന്ത്യ-അമേരിക്ക വ്യാപാര ചർച്ചകൾ റദ്ദാക്കുകയും ഡൽഹിയിലേക്ക് വരാനിരുന്ന യുഎസ് പ്രതിനിധി സംഘത്തെ തടയുകയും ചെയ്തു എന്നും റിപ്പോർട്ടിൽ പറയുന്നു.റഷ്യൻ എണ്ണ വാങ്ങുന്നത് പുടിന് യുക്രെയ്‌നെതിരായ യുദ്ധം തുടരാൻ സഹായിക്കുന്നുവെന്ന് ആരോപിച്ച് ഇന്ത്യയിൽ നിന്ന് ഇറക്കുമതി ചെയ്യുന്ന ഉത്പന്നങ്ങൾക്ക് ട്രംപ് 50% തീരുവ ചുമത്തിയിട്ടുണ്ട്. ഇതിൽ 25% പിഴയായി ചുമത്തിയതാണ്. ഈ പുതിയ തീരുവ ഓഗസ്റ്റ് 27 മുതൽ പ്രാബല്യത്തിൽ വരും.

വ്യാപാരക്കമ്മി ചൂണ്ടിക്കാട്ടി ഒരു രാജ്യത്തെ ആദ്യം ആക്രമിക്കുകയും, പിന്നീട് ഉയർന്ന തീരുവകൾ ചുമത്തുമെന്ന് ഭീഷണിപ്പെടുത്തുകയും ചെയ്യുന്നതാണ് ട്രംപിന്റെ സാധാരണ രീതിയെന്ന് വിദഗ്ദ്ധർ പറയുന്നു. ഇത് ഭയന്ന് ചർച്ചകൾ ആരംഭിക്കുമ്പോൾ, ഉയർന്ന തീരുവകൾ ചുമത്തിയും ചില ഇളവുകൾ നൽകിയും ട്രംപ് വിജയിയാണെന്ന് സ്വയം പ്രഖ്യാപിക്കാറുണ്ട്. എന്നാൽ ഇത്തവണ മോദി ഈ സമ്മർദ്ദത്തിന് വഴങ്ങിയില്ല.