രാജസ്ഥാനിലെ ജോധ്പൂരിൽ സ്ത്രീധന പീഡനത്തെ തുടർന്ന് സ്കൂൾ അധ്യാപികയായ യുവതിയും മൂന്ന് വയസ്സുള്ള മകളും തീകൊളുത്തി മരിച്ചു. അധ്യാപികയായ സഞ്ജു ബിഷ്‌ണോയ് (32), മകൾ യശ്വസി (3) എന്നിവരാണ് മരിച്ചത്. സംഭവത്തിൽ സഞ്ജുവിന്റെ ഭർത്താവ് ദിലീപ് ബിഷ്‌ണോയിക്കെതിരെയും ഭർതൃമാതാപിതാക്കൾക്കുമെതിരെ പോലീസ് കേസെടുത്തു. സഞ്ജുവിന്റെ ആത്മഹത്യാക്കുറിപ്പ് പോലീസ് കണ്ടെത്തിയിട്ടുണ്ട്.
ജോധ്പൂരിലെ സർനാദ കി ധനി എന്ന സ്ഥലത്ത് ഓഗസ്റ്റ് 22-നാണ് സംഭവം നടന്നത്. തീകൊളുത്തിയതിനെ തുടർന്ന് മൂന്ന് വയസ്സുകാരിയായ മകൾ സംഭവസ്ഥലത്തു വെച്ചുതന്നെ മരിച്ചു. ഗുരുതരമായി പൊള്ളലേറ്റ സഞ്ജുവിനെ മഹാത്മാഗാന്ധി ആശുപത്രിയിൽ പ്രവേശിപ്പിച്ചെങ്കിലും പിന്നീട് മരണപ്പെട്ടു.
സഞ്ജുവിന്റെ പിതാവ് നൽകിയ പരാതി പ്രകാരം, 12 വർഷം മുൻപായിരുന്നു ഇവരുടെ വിവാഹം. സ്ത്രീധനമായി ഒരു കാറും മറ്റ് വിലപിടിപ്പുള്ള സാധനങ്ങളും നൽകിയിരുന്നു. എന്നാൽ, വിവാഹശേഷം സഞ്ജു നിരന്തരമായി പീഡനങ്ങൾ നേരിട്ടിരുന്നു. കുട്ടി ജനിച്ചതോടെ പീഡനം വർധിച്ചതായും പരാതിയിൽ പറയുന്നു.
അന്വേഷണത്തിനിടെ കണ്ടെത്തിയ ആത്മഹത്യാക്കുറിപ്പിൽ, ഭർത്താവും ഭർതൃവീട്ടുകാരും നടത്തിയ പീഡനങ്ങളെക്കുറിച്ച് സഞ്ജു വിശദമായി എഴുതിയിട്ടുണ്ടെന്ന് അസിസ്റ്റന്റ് പോലീസ് കമ്മീഷണർ നാഗേന്ദ്ര കുമാർ അറിയിച്ചു. കൂടുതൽ വിവരങ്ങൾക്കായി യുവതിയുടെ മൊബൈൽ ഫോൺ ഫോറൻസിക് പരിശോധനയ്ക്ക് അയച്ചിരിക്കുകയാണ്.