ന്യൂയോർക്ക്: ഓണക്കാലത്തിൻ്റെ ആവേശവും ആരവവും ഉൾക്കൊണ്ട്, ന്യൂയോർക്കിലെ മലയാളികളുടെ കൂട്ടായ്മയായ ന്യൂയോർക്ക് സോഷ്യൽ ക്ലബ് രണ്ടാമത് അന്താരാഷ്ട്ര വടംവലി മാമാങ്കം സംഘടിപ്പിക്കുന്നു. ഓഗസ്റ്റ് 23-ന് ശനിയാഴ്ച രാവിലെ 11 മണിക്ക് റോക്ക് ലാൻഡിലെ ക്നാനായ കമ്മ്യൂണിറ്റി സെന്ററിൽ നടക്കുന്ന ഈ മത്സരം വടംവലി പ്രേമികൾക്ക് ആവേശത്തിൻ്റെ പുതിയ അനുഭവമാകും.

യുകെ, കുവൈറ്റ്, കാനഡ, അമേരിക്കയിലെ വിവിധ സംസ്ഥാനങ്ങൾ എന്നിവിടങ്ങളിൽ നിന്നുള്ള പ്രമുഖ വടംവലി ടീമുകളാണ് ഈ വർഷം മാറ്റുരയ്ക്കാൻ എത്തുന്നത്. അമേരിക്കയിലെ ഏറ്റവും മികച്ച വടംവലി കോർട്ടുകളിലൊന്നാണ് മത്സരത്തിനായി ഒരുക്കിയിട്ടുള്ളത്.കേരളത്തിൽ നിന്നും കടുത്തുരുത്തി എം.എൽ.എ അഡ്വ. മോൻസ് ജോസഫ്, പാലാ എം.എൽ.എ മാണി സി. കാപ്പൻ എന്നിവർ ചടങ്ങിൽ പങ്കെടുക്കും. അതുകൂടാതെ, ന്യൂയോർക്ക് സ്റ്റേറ്റ് സെനറ്റർ ബിൽ വെബർ, റോക്ക് ലാൻഡ് കൗണ്ടി എക്സിക്യൂട്ടീവ് എഡ് ഡേ, ടൗൺ സൂപ്പർവൈസർ ഹൊവാർഡ് ഫിലിപ്സ്, സ്റ്റേറ്റ് അസംബ്ലിമാൻ പാട്രിക് കരോൾ, റോക്ക് ലാൻഡ് കൗണ്ടി ലെജിസ്ലേറ്റർ അനി പോൾ തുടങ്ങിയ പ്രമുഖരും ചടങ്ങിന് മാറ്റ് കൂട്ടും.

വടംവലി മത്സരത്തോടനുബന്ധിച്ച് അമേരിക്കൻ, ഇന്ത്യൻ, മെക്സിക്കൻ, കേരള വിഭവങ്ങൾ ഉൾപ്പെടെയുള്ള ഫുഡ് ഫെസ്റ്റിവൽ ഒരുക്കിയിട്ടുണ്ട്. ഇതിനുപുറമെ, സുപ്രസിദ്ധ വയലിൻ വിദ്വാൻ യെദു കൃഷ്ണൻ അവതരിപ്പിക്കുന്ന വയലിൻ ഫ്യൂഷൻ ഷോ, ട്രൈ-സ്റ്റേറ്റ് അക്കാദമിയുടെ ഹോളിവുഡ് ഡാൻസ്, ന്യൂയോർക്ക് സോഷ്യൽ ക്ലബ് അംഗങ്ങളുടെ ഡാൻസ്, ലോങ് ഐലൻഡ് താളലയത്തിൻ്റെ ചെണ്ട-ശിങ്കാരിമേളം എന്നിവയും ഈ പരിപാടിയെ കൂടുതൽ ആകർഷകമാക്കും.

വടംവലി മത്സരത്തിലെ വിജയികളെ കാത്തിരിക്കുന്നത് ആകർഷകമായ സമ്മാനങ്ങളാണ്. ഒന്നാം സമ്മാനം: റോബർട്ട് അരിച്ചിറ സ്പോൺസർ ചെയ്യുന്ന $5001-ഉം ട്രോഫി. രണ്ടാം സമ്മാനം: റോയ് മറ്റപ്പിള്ളിൽ സ്പോൺസർ ചെയ്യുന്ന $3001-ഉം ട്രോഫിയും. മൂന്നാം സമ്മാനം: മുപ്രാപ്പള്ളിൽ ബ്രദേഴ്സ് സ്പോൺസർ ചെയ്യുന്ന $2001-ഉം ട്രോഫിയും. നാലാം സമ്മാനം: തോമസ് നൈനാൻ സ്പോൺസർ ചെയ്യുന്ന $1001-ഉം ട്രോഫിയും.അഞ്ചാം സമ്മാനം: ബെർണി മുല്ലപ്പള്ളി സ്പോൺസർ ചെയ്യുന്ന $501-ഉം ട്രോഫിയും. ആറാം സമ്മാനം: ഫ്രണ്ട്സ് മ്യൂസിക് കമ്പനി സ്പോൺസർ ചെയ്യുന്ന $501-ഉം ട്രോഫിയും.

ഏഴാം സമ്മാനം: ലക്സ് ഡിസൈൻസ് & ഡെക്കർ സ്പോൺസർ ചെയ്യുന്ന $501-ഉം ട്രോഫിയും. എട്ടാം സമ്മാനം: ഗ്ലോബൽ കൊളിഷൻ ന്യൂയോർക്ക് സ്പോൺസർ ചെയ്യുന്ന $501-ഉം ട്രോഫിയും. ഈ വർഷത്തെ മത്സരത്തിൻ്റെ മെഗാ സ്പോൺസർ ജിതിൻ വർഗീസ് - സെഞ്ച്വറി 21 റോയൽ ആണ്.ന്യൂയോർക്ക് സോഷ്യൽ ക്ലബ് പ്രസിഡൻ്റ് റോയ് മറ്റപ്പിള്ളിൽ, വൈസ് പ്രസിഡൻ്റ് സാജൻ കുഴിപറമ്പിൽ, സെക്രട്ടറി ജിമ്മി പൂഴിക്കുന്നേൽ, ജോയിൻ്റ് സെക്രട്ടറി ഷിബു എബ്രഹാം, ട്രഷറർ ജോസ്‌കുട്ടി പൊട്ടംകുഴി, പി.ആർ.ഒ സിജു ചേരുവൻകാല എന്നിവർ പരിപാടികൾക്ക് നേതൃത്വം നൽകുന്നു. ഈ വടംവലി മാമാങ്കത്തിലേക്ക് കുടുംബസമേതം ഏവരെയും സ്വാഗതം ചെയ്യുന്നതായി സംഘാടകർ അറിയിച്ചു. കൂടുതൽ വിവരങ്ങൾക്കായി പ്രസിഡൻ്റ് റോയ് മറ്റപ്പിള്ളിലിനെ (845-321-2125) ബന്ധപ്പെടാവുന്നതാണ്.