തിരുവനന്തപുരം: ഫൊക്കാനയുടെ ആദ്യ പ്രസിഡൻ്റും നോർക്ക റൂട്ട്സ് ഡയറക്ടറുമായിരുന്ന ഡോ. എം. അനിരുദ്ധന് ആദരാഞ്ജലികൾ അർപ്പിച്ച് കേരള സർക്കാർ തലസ്ഥാനത്ത് അനുസ്മരണ യോഗം നടത്തി. മുഖ്യമന്ത്രി പിണറായി വിജയൻ നേരിട്ട് താൽപ്പര്യമെടുത്ത് സംഘടിപ്പിച്ച ചടങ്ങിൽ പ്രമുഖ വ്യക്തിത്വങ്ങൾ പങ്കെടുത്തു. മാസ്കറ്റ് ഹോട്ടലിൽ നടന്ന ചടങ്ങ് കൃത്യം അഞ്ചുമണിക്ക് മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. വിദ്യാഭ്യാസ മന്ത്രി വി. ശിവൻകുട്ടി അധ്യക്ഷനായിരുന്നു. മുൻ മന്ത്രിമാരായ എം.എം. ഹസൻ, കെ.സി. ജോസഫ്, എം.എ. യൂസഫലി, നോർക്ക വൈസ് ചെയർമാൻ പി. ശ്രീരാമകൃഷ്ണൻ, എസ്. ഹരികിഷോർ IAS എന്നിവരും ഡോ. അനിരുദ്ധന്റെ മകൻ അരുൺ, പ്രവാസി നേതാക്കൾ, മാധ്യമപ്രവർത്തകർ എന്നിവരടങ്ങിയ വലിയൊരു സദസ്സ് ചടങ്ങിന് സാക്ഷ്യം വഹിച്ചു.

ഡോ. അനിരുദ്ധന്റെ ജീവിതത്തെക്കുറിച്ചുള്ള അഞ്ചു മിനിറ്റ് ദൈർഘ്യമുള്ള ഒരു വീഡിയോ പ്രദർശനത്തോടെയാണ് പരിപാടികൾ ആരംഭിച്ചത്. പ്രൊഫ. അലിയാറിന്റെ ശബ്ദത്തിൽ ഡോ. അനിരുദ്ധന്റെ ജീവിതം എല്ലാവരുടെയും ശ്രദ്ധ ആകർഷിച്ചു. മുഖ്യമന്ത്രി പിണറായി വിജയന്റെ അനുസ്മരണ പ്രസംഗം ചടങ്ങിന്റെ പ്രധാന ആകർഷണമായിരുന്നു. താനും ഡോ. അനിരുദ്ധനും തമ്മിലുള്ള ആഴത്തിലുള്ള സൗഹൃദത്തെക്കുറിച്ച് അദ്ദേഹം വികാരഭരിതനായി സംസാരിച്ചു. നായനാർ മന്ത്രിസഭയിൽ അംഗമായിരുന്നപ്പോൾ നടത്തിയ അമേരിക്കൻ യാത്രയിലാണ് ഡോ. അനിരുദ്ധനുമായി പരിചയപ്പെട്ടതെന്നും അത് പിന്നീട് ഹൃദയബന്ധമായി മാറിയെന്നും മുഖ്യമന്ത്രി ഓർത്തെടുത്തു. നോർക്ക റൂട്ട്സ് ഡയറക്ടറായതിന് ശേഷം തങ്ങൾ തമ്മിലുള്ള ബന്ധം കൂടുതൽ ദൃഢമായി.

തന്റെ അമേരിക്കൻ യാത്രകൾ വിവാദമാകുമ്പോൾ പോലും അതിന്റെ സ്വകാര്യത സൂക്ഷിച്ച ഒരു നല്ല സുഹൃത്തും സഹോദരനുമായിരുന്നു ഡോ. അനിരുദ്ധൻ. . തന്റെ ചികിത്സക്കായി അമേരിക്കയിൽ പോയപ്പോൾ മയോ ക്ലിനിക്കിൽ എല്ലാ സഹായങ്ങൾക്കും അദ്ദേഹമാണ് കൂടെയുണ്ടായിരുന്നത്. രോഗശയ്യയിൽ ആയിരുന്നപ്പോൾ ചിക്കാഗോയിൽ പോയി അദ്ദേഹത്തെ കണ്ടതും കൈകളിൽ പിടിച്ച നിമിഷവും മുഖ്യമന്ത്രി ഓർത്തെടുത്തു. ആ സ്പർശനത്തിലൂടെ അവർക്കിടയിലെ ആഴമേറിയ സ്നേഹബന്ധം പരസ്പരം മനസ്സിലാക്കിയെന്ന് അദ്ദേഹം പറഞ്ഞു.

ലോക കേരള സഭയുടെ അമേരിക്കൻ മേഖലാ സമ്മേളനത്തിന് ശേഷം ഡോ. അനിരുദ്ധൻ രോഗവിമുക്തനായി സാധാരണ ജീവിതത്തിലേക്ക് മടങ്ങിയെത്തിയിരുന്നെങ്കിലും പിന്നീട് രോഗം ഗുരുതരമായത് വലിയ നഷ്ടമാണെന്നും അദ്ദേഹം പറഞ്ഞു.അമേരിക്കൻ പൗരത്വം ലഭിക്കാൻ എല്ലാ സാധ്യതകളുണ്ടായിട്ടും ഇന്ത്യൻ പൗരത്വം ഉപേക്ഷിക്കാൻ തയ്യാറാകാതെ എക്കാലത്തും ഒരു ഇന്ത്യക്കാരനായി അഭിമാനിച്ച അദ്ദേഹത്തിന്റെ നിലപാടുകളെ മുഖ്യമന്ത്രി പ്രശംസിച്ചു. ഒരു സഹോദരന്റെ വേർപാടിൽ മറ്റൊരു സഹോദരൻ നടത്തുന്ന ഓർമ്മ പുതുക്കൽ പോലെയായിരുന്നു അദ്ദേഹത്തിന്റെ പ്രസംഗം.

ഫോക്കാനയുടെ ആദ്യ പ്രസിഡന്റെന്ന നിലയിൽ, അമേരിക്കൻ മലയാളികൾക്ക് ഒരു സംഘടനാ ബോധം ഉണ്ടാക്കുന്നതിലും കേരളത്തിൽ സംഘടനയ്ക്ക് ഭാഷാപരമായും സാഹിത്യപരമായും സാംസ്കാരികപരമായും ശ്രദ്ധേയമായ സ്ഥാനം നേടിയെടുക്കുന്നതിലും ഡോ. അനിരുദ്ധൻ വലിയ പങ്കുവഹിച്ചു. അദ്ദേഹത്തിന് ലഭിച്ച ഈ അനുസ്മരണ യോഗം ഫോക്കാനയുടെ ആദ്യ പ്രസിഡന്റായിരുന്ന ഡോ. എം. അനിരുദ്ധന്റെ ദീർഘവീക്ഷണമുള്ള സംഘടനാ പ്രവർത്തനങ്ങൾക്കുള്ള അംഗീകാരമായി കണക്കാക്കാം. എം.എ. യൂസഫലി, എം.എം. ഹസ്സൻ എന്നിവരുടെ അനുസ്മരണ പ്രസംഗങ്ങളും അദ്ദേഹവുമായുള്ള അവരുടെ അടുപ്പം വെളിവാക്കുന്നതായിരുന്നു. ഡോ. അനിരുദ്ധന് പ്രൗഢഗംഭീരമായ ഒരു അനുസ്മരണ സമ്മേളനം ഒരുക്കിയ മുഖ്യമന്ത്രിക്കും നോർക്കയ്ക്കും പ്രവാസി സമൂഹം നന്ദി പറഞ്ഞു.